qalin baf bachche

ye dhāgoñ kī salāḳhoñ meñ muqayyad zard chehre

ye rote khāñste kam-sin

jo dhuñdlī raushnī meñ

mashaqqat jhelte haiñ

aur apne āñsuoñ se khelte haiñ

ye lahrātī huī rangīn beloñ ke jo lambe silsile haiñ

ye kam-sin āñsuoñ ke qāfile haiñ

'ajab sannā'ī se in uñgliyoñ ne

jamāl-o-fan mujassam kar diyā hai

ye phūloñ kī nasoñ aur pattiyoñ meñ

lahū tartīb se yuuñ bhar diyā hai

ki gul-būToñ ko zinda kar diyā hai

ye husn-o-nāzukī kā shāh-pāra

lahū-ālūd lamhoñ kā shumāra

ye qadmoñ meñ paḌā hañstā rahegā

magar ehsās ko Dastā rahegā

ye dhagon ki salaKHon mein muqayyad zard chehre

ye rote khanste kam-sin

jo dhundli raushni mein

mashaqqat jhelte hain

aur apne aansuon se khelte hain

ye lahraati hui rangin belon ke jo lambe silsile hain

ye kam-sin aansuon ke qafile hain

'ajab sanna'i se in ungliyon ne

jamal-o-fan mujassam kar diya hai

ye phulon ki nason aur pattiyon mein

lahu tartib se yun bhar diya hai

ki gul-buTon ko zinda kar diya hai

ye husn-o-nazuki ka shah-para

lahu-alud lamhon ka shumara

ye qadmon mein paDa hansta rahega

magar ehsas ko Dasta rahega