chae-KHane mein baiTha mazdur

chā.e-ḳhāne meñ baiThā mazdūr

apnī ummīd ke bhurbhure ḳhvāb-reze liye

sar se paaoñ talak zindagī ke bakheḌoñ meñ uljhā huā aadmī

daa.eñ baa.eñ kī mezoñ se uThte hue shor se be-ḳhabar

waiter is samt dekho are chaar chaa.e miyāñ dam to le

ek sau das hue mez ḳhālī hai kyā

aisī be-rabt aur be-sar-o-pā sadāoñ meñ baiThā huā

cup kī hiddat ko uñglī ke poroñ kā rasta dikhāte hue

chaa.e ke sip kī shīrīniyoñ se varā

aane vaale na.e kal kī bechainiyoñ se pareshān hai

sāmne shāḳh-e-dīvār par aTke T-V ke hariyāl manzar nazar ke liye bojh haiñ

rang āvāz ḳhushbū talab zā.iqa

sab jazīre bakheḌoñ meñ uljhe hue aadmī ke liye kuchh nahīñ

jis nazar meñ ka.ī āftāb apnī zau kho chuke

us nazar ke liye rang āvāz ḳhushbū talab zā.iqa kuchh nahīñ

chae-KHane mein baiTha mazdur

apni ummid ke bhurbhure KHwab-reze liye

sar se paon talak zindagi ke bakheDon mein uljha hua aadmi

daen baen ki mezon se uThte hue shor se be-KHabar

waiter is samt dekho are chaar chae miyan dam to le

ek sau das hue mez KHali hai kya

aisi be-rabt aur be-sar-o-pa sadaon mein baiTha hua

cup ki hiddat ko ungli ke poron ka rasta dikhate hue

chae ke sip ki shiriniyon se wara

aane wale nae kal ki bechainiyon se pareshan hai

samne shaKH-e-diwar par aTke T-V ke hariyal manzar nazar ke liye bojh hain

rang aawaz KHushbu talab zaiqa

sab jazire bakheDon mein uljhe hue aadmi ke liye kuchh nahin

jis nazar mein kai aaftab apni zau kho chuke

us nazar ke liye rang aawaz KHushbu talab zaiqa kuchh nahin