lunDa bazar

chale aao bhaa.ī chale aao bhaa.ī

na.ī khep kā maal hai

muft ke daam haiñ

aa.iye sāhibān aa.iye

har tarah kā yahāñ maal maujūd hai

ḳhush-numā qīmtī der-pā

nit-na.e faishanoñ kī to bharmār hai

der mat kījiye

bas chale aa.iye dekhte jā.iye

maġhribī falsafoñ ke over-coat haiñ

yorapī 'ilm-o-hikmat ke banyān haiñ

aur yūnān-o-rūmā kī dānishvarī kī haiñ 'umda qamīzeñ

ye german tafakkur kī patlūn dekheñ

ye americī ḳhvāboñ ke rangīn tie

farangī siyāsat kī lambī sī jersey

francisiyoñ ke vajūdī tasavvur ke ḳhamdār maflar

adab kī haiñ shāleñ

taḳhayyul ke chashme

saqāfat kī Topī

ma'īshat ke moze

taraqqī ke juute

samājī khilaune bhī Dheroñ mileñge

chale aao bhaa.ī chale aao bhaa.ī

ye bāzār hai

apnī bastī meñ bas ab yahī ek bāzār hai

apnī mahrūmiyāñ jeb meñ Daal kar

ham chale aa.e haiñ

aa ga.e haiñ ki apne liye

ahl-e-maġhrib kī utran

ye kohna libāde

ye matrūk socheñ ḳharīdeñ

ḳharīdeñ vo malbūs jin meñ hamārī na ḳhushbū koī

aise malbūs jin kā

hamārī saqāfat rivāyat riyāzat se kuchh bhī 'ilāqa nahīñ

kitne be-bas haiñ ham

kitne be-his bhī haiñ

kis qadar ḳhush-dilī se

dar-āmad shuda falsafoñ aur ḳhayāloñ ko oḌhe hue haiñ

balā pesh-o-pas maġhribī tarz-e-ehsās pahne hue haiñ

hamārī vajūdī shu'ūrī ḳhayālī zarūrat kyā puurī huii?

shaḳhsiyat dab ga.ī

zehn bujh sā gayā

aur ham jism se ruuh tak

ho ga.e haiñ ḳhud apne liye ajnabī

jaise duniyā meñ apnī to koī haqīqat nahīñ

chale aao bhai chale aao bhai

nai khep ka mal hai

muft ke dam hain

aaiye sahiban aaiye

har tarah ka yahan mal maujud hai

KHush-numa qimti der-pa

nit-nae faishanon ki to bharmar hai

der mat kijiye

bas chale aaiye dekhte jaiye

maghribi falsafon ke ower-coat hain

yorapi 'ilm-o-hikmat ke banyan hain

aur yunan-o-ruma ki danishwari ki hain 'umda qamizen

ye german tafakkur ki patlun dekhen

ye americi KHwabon ke rangin tie

farangi siyasat ki lambi si jersey

francisiyon ke wajudi tasawwur ke KHamdar maflar

adab ki hain shaalen

taKHayyul ke chashme

saqafat ki Topi

ma'ishat ke moze

taraqqi ke jute

samaji khilaune bhi Dheron milenge

chale aao bhai chale aao bhai

ye bazar hai

apni basti mein bas ab yahi ek bazar hai

apni mahrumiyan jeb mein Dal kar

hum chale aae hain

aa gae hain ki apne liye

ahl-e-maghrib ki utran

ye kohna libaade

ye matruk sochen KHariden

KHariden wo malbus jin mein hamari na KHushbu koi

aise malbus jin ka

hamari saqafat riwayat riyazat se kuchh bhi 'ilaqa nahin

kitne be-bas hain hum

kitne be-his bhi hain

kis qadar KHush-dili se

dar-amad shuda falsafon aur KHayalon ko oDhe hue hain

bala pesh-o-pas maghribi tarz-e-ehsas pahne hue hain

hamari wajudi shu'uri KHayali zarurat kya puri hui?

shaKHsiyat dab gai

zehn bujh sa gaya

aur hum jism se ruh tak

ho gae hain KHud apne liye ajnabi

jaise duniya mein apni to koi haqiqat nahin