guru-nanak

is zamīñ pe jis ghaḌī bechain thī ye zindagī

ādmiyyat thī kahāñ vahshī banā thā aadmī

abr-e-nafrat sar pe thā aur har taraf thī tīrgī

jis ghaḌī maddham paḌī thī ektā kī raushnī

haath uThā.e āsmāñ kī samt jab insān ne

bekas-o-majbūr kī sun lī du'ā rahmān ne

aayā talvanDī meñ jis dam nuur jaag uTThī sahar

chhaT ga.iiñ tārīkiyāñ raushan huā 'ālam kā ghar

saañs lī insāniyat ne ḳhush huā har ik bashar

jis pe nāzāñ hai jahāñ bedī kā thā laḳht-e-jigar

aa gayā duniyā meñ phir ik shāntī kā devtā

haañ gurū-nānak hai amn-o-āshtī kā devtā

us ke hāthoñ ektā kā jaam duniyā ko milā

thā jo nafrat kā dhuāñ az.hān par chhaTne lagā

dil jo zañg-ālūd thā vo ek ā.īna banā

ek hī āvāz meñ shaiḳh-o-barahman ne kahā

aadmī ho aadmī ke dil ko mat taklīf do

hai sabaq nānak kā logo pyaar se dil jiit lo

is zamin pe jis ghaDi bechain thi ye zindagi

aadmiyyat thi kahan wahshi bana tha aadmi

abr-e-nafrat sar pe tha aur har taraf thi tirgi

jis ghaDi maddham paDi thi ekta ki raushni

hath uThae aasman ki samt jab insan ne

bekas-o-majbur ki sun li du'a rahman ne

aaya talwanDi mein jis dam nur jag uTThi sahar

chhaT gain tarikiyan raushan hua 'alam ka ghar

sans li insaniyat ne KHush hua har ek bashar

jis pe nazan hai jahan bedi ka tha laKHt-e-jigar

aa gaya duniya mein phir ek shanti ka dewta

han guru-nanak hai amn-o-ashti ka dewta

us ke hathon ekta ka jam duniya ko mila

tha jo nafrat ka dhuan azhan par chhaTne laga

dil jo zang-alud tha wo ek aaina bana

ek hi aawaz mein shaiKH-o-barahman ne kaha

aadmi ho aadmi ke dil ko mat taklif do

hai sabaq nanak ka logo pyar se dil jit lo