mausam ka almiya

parinde fazāoñ kī lahroñ pe nanhe safīnoñ kī mānind bahte hue

vus'ateñ nāpte haiñ suhānī ruteñ der se daf liye

apne hāthoñ meñ is baat kī muntazir haiñ

havā.eñ purānī kathāoñ ko

paaoñ paḌe ghuñgruoñ kī zabāñ meñ sunā.eñ

ghaTā.eñ manāzir kī āñkhoñ meñ

kājal kī halkī lakīreñ sajāne uThī haiñ

zamīñ ke badan par paḌe ābloñ kī jalan miT ga.ī hai

zamīñ kā badan taaza phūloñ kī mānind phir jal uThā hai

kahīñ duur shāḳhoñ meñ uljhā huā ek zaḳhmī parinda

fazāoñ kī lahroñ pe bahte hue

vus'ateñ nāpne ke jatan kar rahā hai

parinde fazaon ki lahron pe nanhe safinon ki manind bahte hue

wus'aten napte hain suhani ruten der se daf liye

apne hathon mein is baat ki muntazir hain

hawaen purani kathaon ko

paon paDe ghungruon ki zaban mein sunaen

ghaTaen manazir ki aankhon mein

kajal ki halki lakiren sajaane uThi hain

zamin ke badan par paDe aablon ki jalan miT gai hai

zamin ka badan taza phulon ki manind phir jal uTha hai

kahin dur shaKHon mein uljha hua ek zaKHmi parinda

fazaon ki lahron pe bahte hue

wus'aten napne ke jatan kar raha hai