zindagi se guftugu

apsarā

terī āñkhoñ meñ phaile shafaq-rang dhāgoñ kī saugand hai

saañs ke saaz bas apsarā apsarā kī sadāoñ se mā'mūr haiñ

tujh meñ nudrat khanak imbisāt āshtī rang mastūr haiñ

tere kūche ke baasī mohabbat ke ehsās se chuur haiñ

tere dāman meñ sarsabz alfāz ke baur haiñ

apsarā

tere andāz haiñ dil-rubā

kitnī sadiyoñ kī tishna-labī terī ik diid se zang-zādoñ ko bīnā.ī de

tere abrū kī jumbish ḳhizāñ-zad ko rā'nā.ī de

terī bas ik sadā gūñge lafzoñ ko goyā.ī de

dil-zadoñ ko munājāt-paimā.ī de

apsarā

tere dam se bahāreñ shafaq chāñdnī roz-o-shab aas hai

zindagī kī ik ik rag meñ hiddat hai chāhat hai ehsās hai

jāntī hai nā tū kis qadar ḳhaas hai

mujh sā darvesh bhī jo kisī shai kā lobhī nahīñ hai tirā daas hai

tū mohabbat ke amrit meñ bhīgī huī ik lagan apsarā

tū zamānoñ kī ġhāroñ ke sīnoñ meñ madfūn dhun apsarā

tujh se raushan zamīñ chāñd ḳhurshīd tāroñ ke ban apsarā

tū mire lafz kī chāshnī merā fan apsarā

apsara

teri aankhon mein phaile shafaq-rang dhagon ki saugand hai

sans ke saz bas apsara apsara ki sadaon se ma'mur hain

tujh mein nudrat khanak imbisat aashti rang mastur hain

tere kuche ke basi mohabbat ke ehsas se chur hain

tere daman mein sarsabz alfaz ke baur hain

apsara

tere andaz hain dil-ruba

kitni sadiyon ki tishna-labi teri ek did se zang-zadon ko binai de

tere abru ki jumbish KHizan-zad ko ra'nai de

teri bas ek sada gunge lafzon ko goyai de

dil-zadon ko munajat-paimai de

apsara

tere dam se bahaaren shafaq chandni roz-o-shab aas hai

zindagi ki ek ek rag mein hiddat hai chahat hai ehsas hai

jaanti hai na tu kis qadar KHas hai

mujh sa darwesh bhi jo kisi shai ka lobhi nahin hai tera das hai

tu mohabbat ke amrit mein bhigi hui ek lagan apsara

tu zamanon ki ghaaron ke sinon mein madfun dhun apsara

tujh se raushan zamin chand KHurshid taron ke ban apsara

tu mere lafz ki chashni mera fan apsara