yaum-e-azadi-e-jamhur

yaum-e-āzādī-e-jamhūr manāeñge sabhī

'ahd-e-māzī ke din ik ek bhulā.eñge sabhī

phir se mil-jul ke qadam aage baḌhā.eñge sabhī

ik na.ī rāh-e-vafā phir se banā.eñge sabhī

ātish-e-firqa-parastī ko bujhā.eñge sabhī

dekh lenā ki diye ghī ke jalā.eñge sabhī

phuul apne haiñ phal apne haiñ chaman apnā hai

bāġhbāñ apnī hī marzī kā banā.eñge sabhī

faḳhr duniyā kī har ik qaum karegī ham par

ġhair ko siine se jab apne lagā.eñge sabhī

ādmiyyat ko pur-iḳhlās banāne ke liye

zindagī 'itr-e-mohabbat meñ basā.eñge sabhī

saaf saaf aa.e nazar tā-ki haqīqat saarī

ghar ghar is tarh charāġh apne jalā.eñge sabhī

sāz-e-āzādī-e-jamhūr ye mil-jul ke baham

naġhma āzādī-e-jamhūr kā gā.eñge sabhī

ḳhalq ke saath baham ho ke hama-gīr 'jamāl'

husn-e-fitrat kī tarah jalve dikhā.eñge sabhī

yaum-e-azadi-e-jamhur manaenge sabhi

'ahd-e-mazi ke din ek ek bhulaenge sabhi

phir se mil-jul ke qadam aage baDhaenge sabhi

ek nai rah-e-wafa phir se banaenge sabhi

aatish-e-firqa-parasti ko bujhaenge sabhi

dekh lena ki diye ghi ke jalaenge sabhi

phul apne hain phal apne hain chaman apna hai

baghban apni hi marzi ka banaenge sabhi

faKHr duniya ki har ek qaum karegi hum par

ghair ko sine se jab apne lagaenge sabhi

aadmiyyat ko pur-iKHlas banane ke liye

zindagi 'itr-e-mohabbat mein basaenge sabhi

saf saf aae nazar ta-ki haqiqat sari

ghar ghar is tarh charagh apne jalaenge sabhi

saz-e-azadi-e-jamhur ye mil-jul ke baham

naghma aazadi-e-jamhur ka gaenge sabhi

KHalq ke sath baham ho ke hama-gir 'jamal'

husn-e-fitrat ki tarah jalwe dikhaenge sabhi