chand lamhe chand sadiyan

mulāqāt ke chand lamhe

faqat chand lamhe na the

chand sadiyāñ thiiñ

jin meñ mohabbat kī tārīḳh tartīb paatī rahī

tū ne pahle to ik ajnabī kī sī hairat se

phir ek dil-doz apnā.iyat se

mirī samt dekhā

to lamhoñ ke par jhaḌ gaye

terī zulfoñ kī zanjīr saare badan par sajā.e hue

vaqt gaḌ sā gayā

chand lamhe jo sadiyoñ kī mānind phaile

to maiñ ne sunī

bāġh-e-jannat se havvā-o-ādam ke raḳht-e-safar bāñdhne kī sadā

aur phir vo pur-asrār āvāz

jis se ḳhalāoñ ko labrez honā hai

jab ye zamīñ chāñd se

chāñd sūraj se

sūraj kisī aur sūraj se jā kar milegā

yahāñ se vahāñ tak

zamīñ se zamāñ tak

mujhe terī āñkheñ nazar aa rahī thiiñ

samundar tamavvuj meñ the

aur lahreñ mire dil ke sāhil se Takrā rahī thiiñ

vo is vaqt bhī dil ke sāhil se Takrā rahī haiñ

abhī terī āñkhoñ se mānūs hone meñ kuchh der thī

jab tire lab hile

phir ufuq-tā-ufuq

phuul hī phuul the

terī bātoñ kī mah-kār thī

tere lahje meñ kaliyāñ chaTakne kī jhankār thī

aur ye jhankār maiñ aaj bhī sun rahā huuñ

phir ik dam tirā husn mere lahū meñ utarne lagā

zindagī par mujhe

ek muddat ke baa'd

āḳhrī baar

pyaar aa gayā

aur phir maiñ ne dekhā

ki maiñ to azal se tujhe jāntā huuñ

abad tak tujhe yaad rakhnā 'ibādat hai merī

ḳhudā jaane phir kyā huā

chand sadiyāñ guzarne ke baa'd

ab ḳhudā ke sivā kaun jaane

ki phir kyā huā

terī āñkhoñ kī tere laboñ kī qasam

maiñ to bas is qadar jāntā huuñ

ki tujh se mulāqāt ke chand lamhe

faqat chand lamhe na the

chand sadiyāñ thiiñ

jo chand lamhoñ meñ guzrīñ

mulaqat ke chand lamhe

faqat chand lamhe na the

chand sadiyan thin

jin mein mohabbat ki tariKH tartib pati rahi

tu ne pahle to ek ajnabi ki si hairat se

phir ek dil-doz apnaiyat se

meri samt dekha

to lamhon ke par jhaD gaye

teri zulfon ki zanjir sare badan par sajae hue

waqt gaD sa gaya

chand lamhe jo sadiyon ki manind phaile

to main ne suni

bagh-e-jannat se hawwa-o-adam ke raKHt-e-safar bandhne ki sada

aur phir wo pur-asrar aawaz

jis se KHalaon ko labrez hona hai

jab ye zamin chand se

chand suraj se

suraj kisi aur suraj se ja kar milega

yahan se wahan tak

zamin se zaman tak

mujhe teri aankhen nazar aa rahi thin

samundar tamawwuj mein the

aur lahren mere dil ke sahil se Takra rahi thin

wo is waqt bhi dil ke sahil se Takra rahi hain

abhi teri aankhon se manus hone mein kuchh der thi

jab tere lab hile

phir ufuq-ta-ufuq

phul hi phul the

teri baaton ki mah-kar thi

tere lahje mein kaliyan chaTakne ki jhankar thi

aur ye jhankar main aaj bhi sun raha hun

phir ek dam tera husn mere lahu mein utarne laga

zindagi par mujhe

ek muddat ke ba'd

aaKHri bar

pyar aa gaya

aur phir main ne dekha

ki main to azal se tujhe jaanta hun

abad tak tujhe yaad rakhna 'ibaadat hai meri

KHuda jaane phir kya hua

chand sadiyan guzarne ke ba'd

ab KHuda ke siwa kaun jaane

ki phir kya hua

teri aankhon ki tere labon ki qasam

main to bas is qadar jaanta hun

ki tujh se mulaqat ke chand lamhe

faqat chand lamhe na the

chand sadiyan thin

jo chand lamhon mein guzrin