aur main lahr nahin

chāñd larzāñ hai tah-e-āb-e-ravāñ

chāñdnī terī mohabbat kī tarah

merī nas nas mirī rag rag meñ basī jaatī hai

mauj-e-dariyā se pare

moḌ par niim ke peḌoñ kī ghanerī shāḳheñ

bād-e-shab se tirī zulfoñ kī tarah uḌtī haiñ

sarsarāte haiñ hare dhaan ke khet

tere malbūs kī mānind jise

uñgliyāñ merī kabhī chhū na sakīñ

chiir kar ḳhvāb meñ lipTā huā be-pāyāñ ḳhalā

tez raftār parinda shab kā

jo humā hai ki na jaane kyā hai

san se guzrā hai abhī

tujh ko pā lene kī ḳhvāhish kī tarah

chāñd larzāñ hai tah-e-āb-e-ravāñ

chāñdnī terī mohabbat kī tarah

merī nas nas mirī rag rag meñ basī jaatī hai

sat.h-e-dariyā pe machaltī huī lahreñ muḌ kar

dekhtī haiñ ki kināroñ kī namīda miTTī

kitnī be-bas hai subuk-sar hai ki ik rele se

zer hotī hai tah-e-āb chalī jaatī hai

aur maiñ huuñ ki mujhe

isī miTTī se tire jism kī baas aatī hai

aur maiñ lahr nahīñ

chāñd larzāñ hai tah-e-āb-e-ravāñ

chāñdnī terī mohabbat kī tarah

merī nas nas mirī rag rag meñ basī jaatī hai

duur tak ret pe phaile hue qadmoñ ke nishāñ

mujh se kahte haiñ ki is sāhil par

log aate haiñ faqat chand hī lamhoñ ke liye

khod kar chand purāne qisse

DhūñDh kar chand purānī yādeñ

rauñd kar apne hī qadmoñ ke nishāñ

lauT jaate haiñ ḳhudā jaane kahāñ

maiñ ki aayā huuñ yahāñ

chand lamhe nahīñ shab saarī bitāne ke liye

khod kar saare purāne qisse

DhūñDh kar saarī purānī yādeñ

rat-jagā marg-e-mohabbat kā manāne ke liye

naqsh-e-pā apne bhī tere bhī miTāne ke liye

aur phir is pe hai ye zulm ki ye chāñdnī shab

ye machaltī huī lahreñ ye parī-chehra zamīñ

hai tire husn-e-pur-asrār kī mānind hasīñ

lauT kar jā bhī sakūñgā ki nahīñ

chand larzan hai tah-e-ab-e-rawan

chandni teri mohabbat ki tarah

meri nas nas meri rag rag mein basi jati hai

mauj-e-dariya se pare

moD par nim ke peDon ki ghaneri shaKHen

baad-e-shab se teri zulfon ki tarah uDti hain

sarsaraate hain hare dhan ke khet

tere malbus ki manind jise

ungliyan meri kabhi chhu na sakin

chir kar KHwab mein lipTa hua be-payan KHala

tez raftar parinda shab ka

jo huma hai ki na jaane kya hai

san se guzra hai abhi

tujh ko pa lene ki KHwahish ki tarah

chand larzan hai tah-e-ab-e-rawan

chandni teri mohabbat ki tarah

meri nas nas meri rag rag mein basi jati hai

sath-e-dariya pe machalti hui lahren muD kar

dekhti hain ki kinaron ki namida miTTi

kitni be-bas hai subuk-sar hai ki ek rele se

zer hoti hai tah-e-ab chali jati hai

aur main hun ki mujhe

isi miTTi se tere jism ki bas aati hai

aur main lahr nahin

chand larzan hai tah-e-ab-e-rawan

chandni teri mohabbat ki tarah

meri nas nas meri rag rag mein basi jati hai

dur tak ret pe phaile hue qadmon ke nishan

mujh se kahte hain ki is sahil par

log aate hain faqat chand hi lamhon ke liye

khod kar chand purane qisse

DhunDh kar chand purani yaaden

raund kar apne hi qadmon ke nishan

lauT jate hain KHuda jaane kahan

main ki aaya hun yahan

chand lamhe nahin shab sari bitane ke liye

khod kar sare purane qisse

DhunDh kar sari purani yaaden

rat-jaga marg-e-mohabbat ka manane ke liye

naqsh-e-pa apne bhi tere bhi miTane ke liye

aur phir is pe hai ye zulm ki ye chandni shab

ye machalti hui lahren ye pari-chehra zamin

hai tere husn-e-pur-asrar ki manind hasin

lauT kar ja bhi sakunga ki nahin