misaq-e-nau

havā sar-goshiyāñ kartī hai mausam ke badalne kī

chaTaḳhtī dopahr tapte hue zarroñ se kahtī hai

hisār-e-āsmāñ ko toḌ kar bijlī kī tanhā.ī

fazā meñ abr-pāroñ se gale milne ko niklī hai

zamīn-e-muntazir par ras kī būñdoñ kī ye shahnā.ī

ḳhabar detī chalī hai kārvān-e-gul ke chalne kī

havā sar-goshiyāñ kartī hai mausam ke badalne kī

ghaTāoñ ke safīro chāhatoñ ke des meñ aao

visāl-e-ḳhāk-o-bārāñ arz kī kohna-sadāqat hai

tamāzat kī tag-o-dau hai kahāñ tak iftirāq-ārā

'anāsir kā gale milnā nayā mīsāq-e-ulfat hai

zamīn-e-sharq hai qaus-e-quzah kā phir se gahvārā

kalī ke ruup meñ aao kañval ke bhes meñ aao

ghaTāoñ ke safīro chāhatoñ ke des meñ aao

ghaTā barse to dast-e-nāz kā rang-e-hinā chamke

azal se husn kī shīrīñ-adā.ī kā muraqqa' hai

''hilālī-abrū''-o-''chīn-e-jabīñ'' kī naaz farmā.ī

adā ke bait-e-rangīñ kā har ik misra' murassa' hai

zarā bhīge to mahke phuul se 'āriz kī rā'nā.ī

vafā kā naam raushan ho jamāl-e-āshnā chamke

ghaTā barse to dast-e-nāz kā rang-e-hinā chamke

hawa sar-goshiyan karti hai mausam ke badalne ki

chaTaKHti dopahr tapte hue zarron se kahti hai

hisar-e-asman ko toD kar bijli ki tanhai

faza mein abr-paron se gale milne ko nikli hai

zamin-e-muntazir par ras ki bundon ki ye shahnai

KHabar deti chali hai karwan-e-gul ke chalne ki

hawa sar-goshiyan karti hai mausam ke badalne ki

ghaTaon ke safiro chahaton ke des mein aao

visal-e-KHak-o-baran arz ki kohna-sadaqat hai

tamazat ki tag-o-dau hai kahan tak iftiraq-ara

'anasir ka gale milna naya misaq-e-ulfat hai

zamin-e-sharq hai qaus-e-quzah ka phir se gahwara

kali ke rup mein aao kanwal ke bhes mein aao

ghaTaon ke safiro chahaton ke des mein aao

ghaTa barse to dast-e-naz ka rang-e-hina chamke

azal se husn ki shirin-adai ka muraqqa' hai

hilali-abru-o-chin-e-jabin ki naz farmai

ada ke bait-e-rangin ka har ek misra' murassa' hai

zara bhige to mahke phul se 'ariz ki ra'nai

wafa ka nam raushan ho jamal-e-ashna chamke

ghaTa barse to dast-e-naz ka rang-e-hina chamke