bhuk

bhuuk tahzīb ke ādāb bhulā detī hai

hañste insān ko yak-laḳht rulā detī hai

bhuuk ke sāmne talqīn bhī hai be-mā'nī

bhuuk 'āqil ko bhī dīvāna banā detī hai

bhuuk matlab nahīñ rakhtī kabhī ḳhuddārī se

bhuuk insāñ ko ḳhudī se bhī haTā detī hai

bhuuk ke sāmne baune haiñ qavā.id saare

bhuuk tahzīb-o-tamaddun ko miTā detī hai

peT kī aag bujhānī hai zarūrī varna

maut kī niiñd bhī ye bhuuk sulā detī hai

bhuuk ke sāmne vahshī kī haqīqat kyā hai

bhuuk insāñ ko darinda bhī banā detī hai

bhuuk qātil bhī banā detī hai insānoñ ko

aur kabhī daar pe ye bhuuk chaḌhā detī hai

bhuuk kyā jaane hayā kyā hai sharāfat kyā hai

bhuuk to sharm ke parde bhī uThā detī hai

bhuuk hī le ke chalī jaatī hai aubāshoñ meñ

bhuuk hī ‘ismateñ nīlām karā detī hai

bhuuk aa jaa.e agar ġhaiz meñ 'irshād' kabhī

to shahanshāhoñ ke bhī taḳht hilā detī hai

bhuk tahzib ke aadab bhula deti hai

hanste insan ko yak-laKHt rula deti hai

bhuk ke samne talqin bhi hai be-ma'ni

bhuk 'aqil ko bhi diwana bana deti hai

bhuk matlab nahin rakhti kabhi KHuddari se

bhuk insan ko KHudi se bhi haTa deti hai

bhuk ke samne baune hain qawaid sare

bhuk tahzib-o-tamaddun ko miTa deti hai

peT ki aag bujhani hai zaruri warna

maut ki nind bhi ye bhuk sula deti hai

bhuk ke samne wahshi ki haqiqat kya hai

bhuk insan ko darinda bhi bana deti hai

bhuk qatil bhi bana deti hai insanon ko

aur kabhi dar pe ye bhuk chaDha deti hai

bhuk kya jaane haya kya hai sharafat kya hai

bhuk to sharm ke parde bhi uTha deti hai

bhuk hi le ke chali jati hai aubashon mein

bhuk hi ‘ismaten nilam kara deti hai

bhuk aa jae agar ghaiz mein 'irshad' kabhi

to shahanshahon ke bhi taKHt hila deti hai