اردو زبان

نغمۂ اعجاز ہے اردو زباں

خوش لحن خوش ساز ہے اردو زباں

کتنی شیریں کتنی دلکش پر لطیف

آپ کی آواز ہے اردو زباں

کب کھلے بے علم پر اس کے رموز

خوبصورت راز ہے اردو زباں

ناقدوں نے بھی بنایا با کمال

احتشام اعجاز ہے اردو زباں

سخت دل کو موم کر دیتی ہے یہ

پر اثر انداز ہے اردو زباں

اس کی لے پر خوب لہرائی غزل

ہاں جگر کا ساز ہے اردو زباں

دیکھیے قرطاس پر عیب و ہنر

صاحب غماز ہے اردو زباں

تاج کی مانند ہے یہ خوشنما

شہ جہاں ممتاز ہے اردو زباں

محفلوں میں سب سے کہتے تھے فراقؔ

دل نشیں آواز ہے اردو زباں

خود صحیفے کر رہے ہیں انکشاف

دولت شیراز ہے اردو زباں

میرؔ و مومنؔ اور غالبؔ ہیں ظفرؔ

جن پہ کرتی ناز ہے اردو زباں