zist ke thal mein

dil kā Damrū bajātī huī uñgliyāñ sāz-e-hastī ko chheḌeñ agar

rang-o-āhang kā sail-e-ḳhush-bār sā ziist ke thal meñ bhī bah paḌe

aur māyūs āñkhoñ meñ sapnoñ kā Dar bāñTnā vāhima ye kahe

ḳhvāb kā dekhnā nā-ravā to nahīñ

ḳhvāb ko dekhne se na ab tum Daro

dard ke kohr maiñ lipTī āñkho kaho

ḳhvāb ke dā.eroñ kī quzah-rang barkhā kī rut nāchte vaqt kaisī lagī

aañkh meñ ab kahīñ bhī safedī nahīñ

zard sā āsmāñ nīlgūñ ho gayā

aur nazar keh uThī

rang par rang ko be-tarah se malo

saaz ko chheḌ do

raqs meñ hai zamīñ

dil ka Damru bajati hui ungliyan saz-e-hasti ko chheDen agar

rang-o-ahang ka sail-e-KHush-bar sa zist ke thal mein bhi bah paDe

aur mayus aankhon mein sapnon ka Dar banTna wahima ye kahe

KHwab ka dekhna na-rawa to nahin

KHwab ko dekhne se na ab tum Daro

dard ke kohr main lipTi aankho kaho

KHwab ke daeron ki quzah-rang barkha ki rut nachte waqt kaisi lagi

aankh mein ab kahin bhi safedi nahin

zard sa aasman nilgun ho gaya

aur nazar keh uThi

rang par rang ko be-tarah se malo

saz ko chheD do

raqs mein hai zamin