zara si nind

maiñ tujh ko soch kar sotā huuñ

ai ġhārat-gar-e-īmāñ

mujhe hūroñ kī qurbat meñ

bilorīñ jaam milte haiñ

javānī se bhare gul-rang sīnoñ ke

gudāz aur nāzukī mil kar

mire 'mas'ūd' hāthoñ ko jazā-e-ḳhair dete haiñ

hudūd-e-vaqt se bāhar nikal kar

har tarah ke ḳhauf se āzād duniyā meñ

maiñ jab tak chāhtā huuñ jis tarah se chāhtā huuñ maiñ

nashāt-angez aivānoñ meñ dād-e-'aish detā huuñ

ye tujh ko sochnā jānāñ

baḌī achchhī 'ibādat hai

bas itnī shart hai is meñ

ki tujh ko sochte lamhe

mujhe mere irāde se

zarā sī niiñd aa jaa.e

main tujh ko soch kar sota hun

ai ghaarat-gar-e-iman

mujhe huron ki qurbat mein

bilorin jam milte hain

jawani se bhare gul-rang sinon ke

gudaz aur nazuki mil kar

mere 'mas'ud' hathon ko jaza-e-KHair dete hain

hudud-e-waqt se bahar nikal kar

har tarah ke KHauf se aazad duniya mein

main jab tak chahta hun jis tarah se chahta hun main

nashat-angez aiwanon mein dad-e-'aish deta hun

ye tujh ko sochna jaanan

baDi achchhi 'ibaadat hai

bas itni shart hai is mein

ki tujh ko sochte lamhe

mujhe mere irade se

zara si nind aa jae