tazabzub

chāñdnī muzmahil thī tā-ba-nazar

aur āvāra chāñd ThiThurā huā

duur bargad ke phaile peḌoñ meñ

Dhāñptā phir rahā thā 'uryānī

sahmī sahmī thī raat kī devī

aur taare falak ke dāman par

bikhre the jaise ḳhuun ke chhīñTe

mere māthe ke diip bujhne lage

aur ehsās kī taḌaptī havā

itnī shiddat se chīḳhī chillā.ī

merī āñkhoñ kī jādū-nagrī meñ

khul gaye chand aur darvāze

maiñ ne dekhā

zamīñ pe tā-ba-nazar

mere aage sitāre bikhre the

aur hañstā huā sajīlā chāñd

mere qadmoñ se kuchh zarā aage

ik uḌan-tashtarī sī lagtā thā

jis se kuchh ajnabī se sīmīñ haath

apnī jānib mujhe bulāte the

maiñ ne ik sard aah bhar ke kahā

kaise aa.uuñ vahāñ maiñ 'uryāñ huuñ

chāñd ne muskurā ke mujh se kahā

be-ḳhatar ho ke aage baḌhtā aa

chāñdnī kī ye reshmīñ chādar

Dhāñp legī tamām 'uryānī

Dagmagā kar maiñ jūñhī aage baḌhā

merī haarī huī tamannā.eñ

merā shāna jhiñjhoḌ kar bolīñ

kis taraf jā rahā hai ai pagle

tere aage 'ajīb dariyā hai

jis ke shaffāf niile paanī meñ

'aks hī 'aks haiñ fazāoñ ke

chandni muzmahil thi ta-ba-nazar

aur aawara chand ThiThura hua

dur bargad ke phaile peDon mein

Dhanpta phir raha tha 'uryani

sahmi sahmi thi raat ki dewi

aur tare falak ke daman par

bikhre the jaise KHun ke chhinTe

mere mathe ke dip bujhne lage

aur ehsas ki taDapti hawa

itni shiddat se chiKHi chillai

meri aankhon ki jadu-nagri mein

khul gaye chand aur darwaze

main ne dekha

zamin pe ta-ba-nazar

mere aage sitare bikhre the

aur hansta hua sajila chand

mere qadmon se kuchh zara aage

ek uDan-tashtari si lagta tha

jis se kuchh ajnabi se simin hath

apni jaanib mujhe bulate the

main ne ek sard aah bhar ke kaha

kaise aaun wahan main 'uryan hun

chand ne muskura ke mujh se kaha

be-KHatar ho ke aage baDhta aa

chandni ki ye reshmin chadar

Dhanp legi tamam 'uryani

Dagmaga kar main junhi aage baDha

meri haari hui tamannaen

mera shana jhinjhoD kar bolin

kis taraf ja raha hai ai pagle

tere aage 'ajib dariya hai

jis ke shaffaf nile pani mein

'aks hi 'aks hain fazaon ke