number game

har ek shaḳhs munfarid hai apnī apnī zaat meñ

har ek soch muḳhtalif hai saarī kā.ināt meñ

har aadmī ba-zāt-e-ḳhud alag hī kā.ināt hai

jo shaḳhsiyat ke Dhang haiñ

ye zindagī ke rang haiñ

ḳhushī kī jal-tarang haiñ

magar ye kaisā rog hai

ye kaisā ibtizāl hai

gine gaye haiñ aadmī

na soch kī parakh kahīñ

na ḳhvāb mustanad koī

ki aadmī kī shaḳhsiyat

ḳhayāl āgahī ḳhirad

junūn 'ishq aur tarab

haqīr-tar haiñ sab ke sab

nahīñ janāb aap kī dalīl be-asās hai

ḳhalish bilā-javāz hai

ḳhayāl jāñchne kā aur shu'ūr nāpne kā intizām lā-javāb hai

jadīdiyat kā daur hai balā kā irtibāt hai

jadīdiyat kī taal par

ḳhayāl aur shu'ūr ke

tamām naqd-o-zāviye

'adad pe muntabaq hue

shumāriyāt ban gaye

satā.ish-e-jamāl-e-yār nisbatoñ se aT ga.ī

nazākat-e-mizāj bhī ikā.iyoñ meñ baT ga.ī

suḳhan-tarāz-o-naġhma-gar ḳhamoshiyoñ meñ kho gaye

hazārhā jo rang the siyah safed ho gaye

samāj kī haqīqatoñ pe kaise tabsira kareñ

mu'āshre ke roz-o-shab kā kis se tazkira kareñ

ulajh ga.ī jo soch kī girah vo kholte raheñ

ishāriyoñ ke khurdure badan TaTolte raheñ

ḳhayāl bāñjh ho gaye talab kī aisī dhun lagī

havas kī āñdhiyoñ meñ ghir ke rah ga.ī hai zindagī

'adad meñ bartarī kī justujū se hāñptī huī

ishāriyoñ ke bojh se laraztī kāñptī huī

ye daur-e-nau kī āgahī

hamāre ḳhvāb khā ga.ī

ki aaj kā ye aadmī

kabhī jo ik vujūd thā

'adad meñ munqalib huā

'adad hī ban ke rah gayā

yaqīn hai sarāb hai

'adad hī kul nisāb hai

ki mantiqoñ ke jaal meñ ḳhirad kā ik mazār hai

shumār-dar-shumār-dar-shumār-dar-shumār hai

har ek shaKHs munfarid hai apni apni zat mein

har ek soch muKHtalif hai sari kainat mein

har aadmi ba-zat-e-KHud alag hi kainat hai

jo shaKHsiyat ke Dhang hain

ye zindagi ke rang hain

KHushi ki jal-tarang hain

magar ye kaisa rog hai

ye kaisa ibtizal hai

gine gaye hain aadmi

na soch ki parakh kahin

na KHwab mustanad koi

ki aadmi ki shaKHsiyat

KHayal aagahi KHirad

junun 'ishq aur tarab

haqir-tar hain sab ke sab

nahin janab aap ki dalil be-asas hai

KHalish bila-jawaz hai

KHayal jaanchne ka aur shu'ur napne ka intizam la-jawab hai

jadidiyat ka daur hai bala ka irtibaat hai

jadidiyat ki tal par

KHayal aur shu'ur ke

tamam naqd-o-zawiye

'adad pe muntabaq hue

shumariyat ban gaye

sataish-e-jamal-e-yar nisbaton se aT gai

nazakat-e-mizaj bhi ikaiyon mein baT gai

suKHan-taraaz-o-naghma-gar KHamoshiyon mein kho gaye

hazarha jo rang the siyah safed ho gaye

samaj ki haqiqaton pe kaise tabsira karen

mu'ashre ke roz-o-shab ka kis se tazkira karen

ulajh gai jo soch ki girah wo kholte rahen

ishaariyon ke khurdure badan TaTolte rahen

KHayal banjh ho gaye talab ki aisi dhun lagi

hawas ki aandhiyon mein ghir ke rah gai hai zindagi

'adad mein bartari ki justuju se hanpti hui

ishaariyon ke bojh se larazti kanpti hui

ye daur-e-nau ki aagahi

hamare KHwab kha gai

ki aaj ka ye aadmi

kabhi jo ek wujud tha

'adad mein munqalib hua

'adad hi ban ke rah gaya

yaqin hai sarab hai

'adad hi kul nisab hai

ki mantiqon ke jal mein KHirad ka ek mazar hai

shumar-dar-shumar-dar-shumar-dar-shumar hai