muqaddas diwali

diip armāñ jalāne lage haiñ

bām-o-dar jagmagāne lage haiñ

ġham ke maare Thikāne lage haiñ

raam dhun mil ke gaane lage haiñ

jaam koī nahīñ aaj ḳhālī

aa ga.ī phir muqaddas divālī

ho rahe haiñ masarrat ke sāmāñ

hai ayodhya meñ har sū charāġhāñ

saj rahe haiñ diloñ ke gulistāñ

har ravish hai daraḳhshāñ daraḳhshāñ

shaam hai chandramā kī ujālī

aa ga.ī phir muqaddas divālī

raam ne ran meñ lanka ko jiitā

ek jug jin kā jangal meñ biitā

aa ga.iiñ saath lachhman ke siitā

bah rahī hai ḳhushī kī sarītā

surḳh-rū hai gulistāñ kā maalī

aa ga.ī phir muqaddas divālī

jaam ḳhushiyoñ ke bhar kar uchhālo

saare armān dil ke nikālo

ek ho kar añdheroñ ko Taalo

ai divālī ke dil-kash ujālo

desh maatā banī hai savālī

aa ga.ī phir muqaddas divālī

dip arman jalane lage hain

baam-o-dar jagmagane lage hain

gham ke mare Thikane lage hain

ram dhun mil ke gane lage hain

jam koi nahin aaj KHali

aa gai phir muqaddas diwali

ho rahe hain masarrat ke saman

hai ayodhya mein har su charaghan

saj rahe hain dilon ke gulistan

har rawish hai daraKHshan daraKHshan

sham hai chandrama ki ujali

aa gai phir muqaddas diwali

ram ne ran mein lanka ko jita

ek jug jin ka jangal mein bita

aa gain sath lachhman ke sita

bah rahi hai KHushi ki sarita

surKH-ru hai gulistan ka mali

aa gai phir muqaddas diwali

jam KHushiyon ke bhar kar uchhaalo

sare arman dil ke nikalo

ek ho kar andheron ko Talo

ai diwali ke dil-kash ujalo

desh mata bani hai sawali

aa gai phir muqaddas diwali