bistar mein

shaam ke khāne ke baa'd

kuchh gharelū mas.aloñ par guftugū hotī rahī

bhaa.ī ko college kī us taqrīb kī ḳhātir rupa.e darkār the

fikr thī ammī ko kaise ho sakegā puurā najma kā jahez

aur abbā sochte the kis tarah sañbhle bigaḌtā kār-o-bār

Thiik hai in sab kī socheñ zindagī kā jabr haiñ

kaise jī saktā hai koī is tarah soche baġhair

par ḳhudā jaane mujhe kyā ho gayā thā ek bhī lamhe ko maiñ

apne kumbe ke masā.il meñ na shāmil ho sakā

aur saarā vaqt guzrā bas isī ik dhyān meñ

maiñ ne jo paudā lagāyā hai chamelī kā yahāñ

kal khileñgī is pe pahlī baar kaliyāñ sub.h-dam

dekh kar in ko khil uTThūñgā ḳhushī ke saath maiñ

sātveñ din ḳhud ḳhudā shāyad na itnā mast ho

jis qadar mastī kā imkāñ hai mujhe kal sub.h ko

aañkh kyuuñ ab tak khulī hai niiñd kyuuñ aatī nahīñ

koī dukh bhī to nahīñ hai jo jagā.e raat bhar

haañ bas ab battī bujhā kar so hī jaanā chāhiye

sub.h ko nannhī chamelī par lagī hoñgī

sajīlī narm kaliyāñ pahlī baar

sham ke khane ke ba'd

kuchh gharelu masalon par guftugu hoti rahi

bhai ko college ki us taqrib ki KHatir rupae darkar the

fikr thi ammi ko kaise ho sakega pura najma ka jahez

aur abba sochte the kis tarah sanbhle bigaDta kar-o-bar

Thik hai in sab ki sochen zindagi ka jabr hain

kaise ji sakta hai koi is tarah soche baghair

par KHuda jaane mujhe kya ho gaya tha ek bhi lamhe ko main

apne kumbe ke masail mein na shamil ho saka

aur sara waqt guzra bas isi ek dhyan mein

main ne jo pauda lagaya hai chameli ka yahan

kal khilengi is pe pahli bar kaliyan subh-dam

dekh kar in ko khil uTThunga KHushi ke sath main

satwen din KHud KHuda shayad na itna mast ho

jis qadar masti ka imkan hai mujhe kal subh ko

aankh kyun ab tak khuli hai nind kyun aati nahin

koi dukh bhi to nahin hai jo jagae raat bhar

han bas ab batti bujha kar so hi jaana chahiye

subh ko nannhi chameli par lagi hongi

sajili narm kaliyan pahli bar