libas-e-ittihad

dekhnā kuchh chāhiye kuchh kar dikhānā chāhiye

parda-e-ġhaflat ko āñkhoñ se haTānā chāhiye

dil ko bāham gard-e-kīna se bachānā chāhiye

dāman-e-aḳhlāq par dhabba na aanā chāhiye

koī ḳhāka zindagī kā koī tasvīr-e-'amal

chhoḌ kar is 'ālam-e-fānī se jaanā chāhiye

kār-farmā hai tamaddun jab ki apnī zaat meñ

phir hameñ ik dūsre ke kaam aanā chāhiye

'aql-o-dānish luuT letī hai ġhulāmī kī sharāb

hurriyat kā jaam hosh-afzā chaḌhānā chāhiye

jis tarah ruktā nahīñ hai sail-e-dariyā josh meñ

yuuñ qadam rāh-e-taraqqī meñ baḌhānā chāhiye

kāhilī meñ aur mehnat meñ hai ye farq-e-'amal

is ko ik pal sirf is ko ik zamāna chāhiye

chāhiye ham ko na hamdam ġhair kā chang-o-rabāb

saaz apnā chāhiye apnā tarāna chāhiye

chal rahī hai sho’la-zā bād-e-muḳhālif tund-o-tez

ātish-e-tafrīq se dāman bachānā chāhiye

jis se bantā ho libās-e-ittihād-o-ittifāq

aisā taanā chāhiye aur aisā baanā chāhiye

paḌ rahī hai phūloñ par gulchīñ kī duzdīda-nazar

naujavānān-e-chaman ko sar uThānā chāhiye

rū-siyah hāsid na paa.e ab kahīñ chhupne kī jā

sham'-e-ḳhulq-e-bāhamī ghar ghar jalānā chāhiye

jurm-e-'isyāñ ke liye darkār hai hiila koī

shān-e-rahmat ke liye koī bahāna chāhiye

kījiye kuchh zikr-o-fikr-e-daur-e-mustaqbil 'jamāl'

jā chukā jo vaqt us ko bhuul jaanā chāhiye

dekhna kuchh chahiye kuchh kar dikhana chahiye

parda-e-ghaflat ko aankhon se haTana chahiye

dil ko baham gard-e-kina se bachana chahiye

daman-e-aKHlaq par dhabba na aana chahiye

koi KHaka zindagi ka koi taswir-e-'amal

chhoD kar is 'alam-e-fani se jaana chahiye

kar-farma hai tamaddun jab ki apni zat mein

phir hamein ek dusre ke kaam aana chahiye

'aql-o-danish luT leti hai ghulami ki sharab

hurriyat ka jam hosh-afza chaDhana chahiye

jis tarah rukta nahin hai sail-e-dariya josh mein

yun qadam rah-e-taraqqi mein baDhana chahiye

kahili mein aur mehnat mein hai ye farq-e-'amal

is ko ek pal sirf is ko ek zamana chahiye

chahiye hum ko na hamdam ghair ka chang-o-rabab

saz apna chahiye apna tarana chahiye

chal rahi hai sho’la-za baad-e-muKHalif tund-o-tez

aatish-e-tafriq se daman bachana chahiye

jis se banta ho libas-e-ittihad-o-ittifaq

aisa tana chahiye aur aisa bana chahiye

paD rahi hai phulon par gulchin ki duzdida-nazar

naujawanan-e-chaman ko sar uThana chahiye

ru-siyah hasid na pae ab kahin chhupne ki ja

sham'-e-KHulq-e-bahami ghar ghar jalana chahiye

jurm-e-'isyan ke liye darkar hai hila koi

shan-e-rahmat ke liye koi bahana chahiye

kijiye kuchh zikr-o-fikr-e-daur-e-mustaqbil 'jamal'

ja chuka jo waqt us ko bhul jaana chahiye