pasheman

mashiyyat ne havāoñ par mirā chehra likhā

ḳhāl-o-ḳhat-o-naqsh-o-nigār-o-jism-o-dil

afkār phūñke ruuh baḳhshī jazbe Tapkā.e nigāhoñ meñ

tirī qudrat ne ik paikar utārā

ḳhāmushī kī god meñ

tanhā.ī ke āñchal ne Dhāñpā

sabz jangal kitnā gahrā kitnā ThanDā aur añdherā

chup bahut gunjān hai

niilī ḳhalā.eñ saañs letī haiñ

mire aañsū paḌhe jaate haiñ jazbe naape jaate haiñ

mire dukh ko magar tolā nahīñ jaatā

zabāñ par qufl hai jo zang-ḳhurda hai

use toḌā to jaatā hai magar kholā nahīñ jaatā

kiran ke pīchhe ik titlī vo lapkī

aañkh kyuuñ jhapkī

qatāreñ bāñdhe niile āsmāñ ke nīche nīche dhuup meñ rangīñ

vo ujle sone chāñdī ke se bādal kyuuñ uḌe

jaate haiñ kis jānib

magar jangal hai gahrā zard ThanDā aur añdherā

shaam hai andar hī andar TūTtī hai zindagī

ab lauT apne aap meñ ab lauT aa

maiñ lauT aa.ī aur apne sāmne aa.ī to lamha uḌ gayā

vo lamha jab mere ḳhudā ne mere paikar ko tarāshā

aur zamīñ kī samt yuuñ ruḳhsat kiyā

jaise pashemāñ ho

mashiyyat ne hawaon par mera chehra likha

KHal-o-KHat-o-naqsh-o-nigar-o-jism-o-dil

afkar phunke ruh baKHshi jazbe Tapkae nigahon mein

teri qudrat ne ek paikar utara

KHamushi ki god mein

tanhai ke aanchal ne Dhanpa

sabz jangal kitna gahra kitna ThanDa aur andhera

chup bahut gunjaan hai

nili KHalaen sans leti hain

mere aansu paDhe jate hain jazbe nape jate hain

mere dukh ko magar tola nahin jata

zaban par qufl hai jo zang-KHurda hai

use toDa to jata hai magar khola nahin jata

kiran ke pichhe ek titli wo lapki

aankh kyun jhapki

qataren bandhe nile aasman ke niche niche dhup mein rangin

wo ujle sone chandi ke se baadal kyun uDe

jate hain kis jaanib

magar jangal hai gahra zard ThanDa aur andhera

sham hai andar hi andar TuTti hai zindagi

ab lauT apne aap mein ab lauT aa

main lauT aai aur apne samne aai to lamha uD gaya

wo lamha jab mere KHuda ne mere paikar ko tarasha

aur zamin ki samt yun ruKHsat kiya

jaise pasheman ho