zikr us pari-wash ka

tumhī ne to mujh se kahā thā ki maiñ

be-karāñ vus'atoñ kā ahāta karūñ

aur phailī huī us zamīñ kā suhānā

badan apne bosoñ se gul-nār kar duuñ

magar tab talak chhā chuke the mire sar pe bādal hayā ke

mire sāmne raunaqeñ thiiñ javāñ tāzgī thī

magar maiñ

har ik rang se apnī begāngī mushtahar kar chukā thā

mire sāmne tum khaḌī thiiñ

nigāhoñ meñ ThanDe javāñ chāñd kī raushnī ko chhupā.e

ye us 'ahd kā ik latīfa hai

jab maiñ

ḳhalā meñ bhaTakte hue bādaloñ kī tarah

zindagī ke har ik husn par

ik uchaTtī nazar Daal kar chal rahā thā

ka.ī sāgaroñ parbatoñ se guzar kar

vo saa.e na-jāne kahāñ kho ga.e haiñ

maiñ ab rāste ke har ik moḌ se pūchhtā huuñ

ki pichhle janam meñ

idhar se guzarte hue tum ne dekhā us ko

tumhi ne to mujh se kaha tha ki main

be-karan wus'aton ka ahata karun

aur phaili hui us zamin ka suhana

badan apne boson se gul-nar kar dun

magar tab talak chha chuke the mere sar pe baadal haya ke

mere samne raunaqen thin jawan tazgi thi

magar main

har ek rang se apni begangi mushtahar kar chuka tha

mere samne tum khaDi thin

nigahon mein ThanDe jawan chand ki raushni ko chhupae

ye us 'ahd ka ek latifa hai

jab main

KHala mein bhaTakte hue baadalon ki tarah

zindagi ke har ek husn par

ek uchaTti nazar Dal kar chal raha tha

kai sagaron parbaton se guzar kar

wo sae na-jaane kahan kho gae hain

main ab raste ke har ek moD se puchhta hun

ki pichhle janam mein

idhar se guzarte hue tum ne dekha us ko