junun-e-azadi

'azm-paimā sitam uThānā thā

ġham pe sau baar ġham bhī khānā thā

qaum kā hausla baḌhānā thā

jaan denī thī ghar bachānā thā

mulk meñ naam kar ke jaanā thā

zauq-e-hubb-e-vatan dikhānā thā

phir mazāq-e-suḳhan dikhānā thā

phir koī taaza gul khilānā thā

hañsne vāloñ ko phir rulānā thā

rone vāloñ ko phir hañsānā thā

ho ke āzād muskurānā thā

shād-mānī kā naġhma gaanā thā

sar meñ hotā junūn-e-āzādī

toḌ detā thā dām-e-sayyādī

dekhnī thī na ḳhāna-barbādī

hotā vīrāna rashk-e-āzādī

tinke chun chun ke ghar banānā thā

apnā ujḌā vatan basānā thā

vo bhī din the ki kāmyāb the ham

vo bhī din the ki bāryāb the ham

mulk-e-san'at pe fat.h-yāb the ham

daur-e-hirfat meñ intiḳhāb the ham

apne hāthoñ meñ har ḳhazāna thā

vo zamāna bhī ik zamānā thā

ham vahī haiñ ki thā vatan apnā

har tarah se thā man-wa-‘an apnā

phuul apne the aur chaman apnā

apnā jaama thā aur tan apnā

apnā pahnā thā apnā khānā thā

apnā paanī thā apnā daana thā

Tahnī Tahnī ko bārhā dekhā

phuul kāñTe ko ek-jā dekhā

ġhunche ġhunche ko lab-kushā dekhā

patte patte ko ham-navā dekhā

jis zabāñ par bhī jo fasānā thā

apne hī mulk kā tarāna thā

hāsil-e-qīl-o-qāl dekh liyā

ahl-e-duniyā kā haal dekh liyā

dostī kā ma.aal dekh liyā

kar ke chāhat 'jamāl' dekh liyā

dil lagānā to ik bahānā thā

al-ġharaz matlabī zamānā thā

'azm-paima sitam uThana tha

gham pe sau bar gham bhi khana tha

qaum ka hausla baDhana tha

jaan deni thi ghar bachana tha

mulk mein nam kar ke jaana tha

zauq-e-hubb-e-watan dikhana tha

phir mazaq-e-suKHan dikhana tha

phir koi taza gul khilana tha

hansne walon ko phir rulana tha

rone walon ko phir hansana tha

ho ke aazad muskurana tha

shad-mani ka naghma gana tha

sar mein hota junun-e-azadi

toD deta tha dam-e-sayyaadi

dekhni thi na KHana-barbaadi

hota virana rashk-e-azadi

tinke chun chun ke ghar banana tha

apna ujDa watan basana tha

wo bhi din the ki kaamyab the hum

wo bhi din the ki baryab the hum

mulk-e-san'at pe fath-yab the hum

daur-e-hirfat mein intiKHab the hum

apne hathon mein har KHazana tha

wo zamana bhi ek zamana tha

hum wahi hain ki tha watan apna

har tarah se tha man-wa-‘an apna

phul apne the aur chaman apna

apna jama tha aur tan apna

apna pahna tha apna khana tha

apna pani tha apna dana tha

Tahni Tahni ko barha dekha

phul kanTe ko ek-ja dekha

ghunche ghunche ko lab-kusha dekha

patte patte ko ham-nawa dekha

jis zaban par bhi jo fasana tha

apne hi mulk ka tarana tha

hasil-e-qil-o-qal dekh liya

ahl-e-duniya ka haal dekh liya

dosti ka maal dekh liya

kar ke chahat 'jamal' dekh liya

dil lagana to ek bahana tha

al-gharaz matlabi zamana tha