KHamyaza

kahāñ ye du'ā thī ki rāh-e-vafā meñ kabhī to koī lamha-e-qurb aa.e

kahāñ ab ye 'ālam ki ek ek sā'at hamārī mulāqāt kī rāz-dāñ hai

ye jī chāhtā hai kisī tarh guzrā zamāna hī ik baar phir lauT aa.e

vahī jism jo hijr kī shab meñ mere liye chashma-e-nūr thā

paas aayā to patthar kī sil ban gayā hai

na ab is ke shaffāf siine meñ vo chāñdnī kī phuvāreñ

na ab bāzuoñ meñ vo pahlī sī lachkīlī gadrāhaTeñ haiñ

ye 'āriz haiñ yā din meñ nikle hue chāñd kā muzmahil 'aks haiñ

agar vasl kī ne'matoñ kā yahī taur hai to maiñ is taur se baaz aayā

mujhe tum ḳhudā-rā vahī merā guzrā huā daur de do

vo gardan kā ḳham vo nigāh-e-taġhāful phir ik baar merā muqaddar banā do

maiñ nazdīk aa.uuñ to dāman jhaTak do

phir is jism is dil ko qurbat kī ālūdgī se chhuḌā kar

usī ajnabiyyat kī doshīzgī se sajā do

kahan ye du'a thi ki rah-e-wafa mein kabhi to koi lamha-e-qurb aae

kahan ab ye 'alam ki ek ek sa'at hamari mulaqat ki raaz-dan hai

ye ji chahta hai kisi tarh guzra zamana hi ek bar phir lauT aae

wahi jism jo hijr ki shab mein mere liye chashma-e-nur tha

pas aaya to patthar ki sil ban gaya hai

na ab is ke shaffaf sine mein wo chandni ki phuwaren

na ab bazuon mein wo pahli si lachkili gadrahaTen hain

ye 'ariz hain ya din mein nikle hue chand ka muzmahil 'aks hain

agar wasl ki ne'maton ka yahi taur hai to main is taur se baz aaya

mujhe tum KHuda-ra wahi mera guzra hua daur de do

wo gardan ka KHam wo nigah-e-taghaful phir ek bar mera muqaddar bana do

main nazdik aaun to daman jhaTak do

phir is jism is dil ko qurbat ki aaludgi se chhuDa kar

usi ajnabiyyat ki doshizgi se saja do