mansab

kitne auhām-e-ḳhayālī kī parastār hai tū

phuul ko chhoḌ ke ḳhushbū kī talabgār hai tū

merī mahbūb ye kis daur kā kirdār hai tū

terī be-laus tamannā se to inkār nahīñ

'āshiqī 'izzat-o-nāmūs kī dīvār nahīñ

apnī hī aag meñ jalnā koī īsār nahīñ

terā iḳhlās ba-jā hai magar ai jān-e-vafā

is qadar pākī-e-dāmāñ kī hikāyat na baḌhā

ham haiñ insāñ na valī haiñ na payāmbar na ḳhudā

ye tahārat kā tasavvur to falātūnī hai

daulat-e-husn bachānā bhī to qārūnī hai

bin tire ḳhuld-e-mohabbat kī fazā suunī hai

kab talak koī ġham-e-hijr kā talḳhāb piye

kab talak koī mare ḳhvāboñ kī jannat ke liye

'ishq ḳhushbū hai ye kab tak koī ḳhushbū pe jiye

tohmat-e-vasl uThānā to koī jurm nahīñ

pyaar kā jashn manānā to koī jurm nahīñ

is pe martā hai zamāna to koī jurm nahīñ

jism ik zinda haqīqat hai nigāhoñ ke liye

jhuul jaanā hī to me'rāj hai bāhoñ ke liye

dahr meñ aatā hai insān gunāhoñ ke liye

kitne auham-e-KHayali ki parastar hai tu

phul ko chhoD ke KHushbu ki talabgar hai tu

meri mahbub ye kis daur ka kirdar hai tu

teri be-laus tamanna se to inkar nahin

'ashiqi 'izzat-o-namus ki diwar nahin

apni hi aag mein jalna koi isar nahin

tera iKHlas ba-ja hai magar ai jaan-e-wafa

is qadar paki-e-daman ki hikayat na baDha

hum hain insan na wali hain na payambar na KHuda

ye tahaarat ka tasawwur to falatuni hai

daulat-e-husn bachana bhi to qaruni hai

bin tere KHuld-e-mohabbat ki faza suni hai

kab talak koi gham-e-hijr ka talKHab piye

kab talak koi mare KHwabon ki jannat ke liye

'ishq KHushbu hai ye kab tak koi KHushbu pe jiye

tohmat-e-wasl uThana to koi jurm nahin

pyar ka jashn manana to koi jurm nahin

is pe marta hai zamana to koi jurm nahin

jism ek zinda haqiqat hai nigahon ke liye

jhul jaana hi to me'raj hai bahon ke liye

dahr mein aata hai insan gunahon ke liye