bhunchaal

kurra-e-arz kī mānind hai insāñ kā vujūd

sat.h par phuul haiñ sabza hai ḳhunak chhāñv hai

barf hai chāñdnī hai raat hai ḳhāmoshī hai

aur bādal jo fazāoñ meñ ravāñ haiñ chup-chāp

duur se motiye ke Dher nazar aate haiñ

aur bātin meñ garajtā hai vo laavā jis se

zalzale aate haiñ, kohsār chaTaḳh jaate haiñ

kis ko fursat hai ki ik pal ko ThiThak kar soche

lab-e-dariyā jo ye mā'sūm sā ik gaañv hai

is ke nīche vo jahannam hai ki jab jāgegā

aadmī apne hī paikar se nikal bhāgegā

kurra-e-arz kī mānind hai insāñ kā vujūd

kis ko mā'lūm ki rā'nā.ī-e-tan ke us paar

kaun jaane ki damakte hue 'āriz se udhar

nik.hat-e-gesū-o-shīrīnī-e-lab ke pīchhe

husn-e-tahzīb-o-tamaddun se zarā sā haT kar

zehn kī ātish-e-sayyāl meñ paḌte haiñ bhañvar

us ke raste meñ koī falsafa haa.el ho agar

qadreñ tharrātī haiñ me'yār ulaT jaate haiñ

aur us zalzala-e-fikr-o-nazar se har baar

kitne dīvāne rivāyat se daġhā karte haiñ

kitne but TūTte haiñ kitne ''ḳhudā'' marte haiñ

kurra-e-arz ki manind hai insan ka wujud

sath par phul hain sabza hai KHunak chhanw hai

barf hai chandni hai raat hai KHamoshi hai

aur baadal jo fazaon mein rawan hain chup-chap

dur se motiye ke Dher nazar aate hain

aur baatin mein garajta hai wo lawa jis se

zalzale aate hain, kohsar chaTaKH jate hain

kis ko fursat hai ki ek pal ko ThiThak kar soche

lab-e-dariya jo ye ma'sum sa ek ganw hai

is ke niche wo jahannam hai ki jab jagega

aadmi apne hi paikar se nikal bhagega

kurra-e-arz ki manind hai insan ka wujud

kis ko ma'lum ki ra'nai-e-tan ke us par

kaun jaane ki damakte hue 'ariz se udhar

nikhat-e-gesu-o-shirini-e-lab ke pichhe

husn-e-tahzib-o-tamaddun se zara sa haT kar

zehn ki aatish-e-sayyal mein paDte hain bhanwar

us ke raste mein koi falsafa hael ho agar

qadren tharraati hain me'yar ulaT jate hain

aur us zalzala-e-fikr-o-nazar se har bar

kitne diwane riwayat se dagha karte hain

kitne but TuTte hain kitne KHuda marte hain