dhundle KHad-o-Khaal

yuuñ na dekho mujhe

jaise mere hāthoñ se

koī bahut qīmtī ābgīna chhūT gayā ho

haañ

maiñ ne barsoñ tumhārī sāñsoñ kī lau se

apne kamre kā añdherā kaaTā hai

tumhārī bātoñ kī narm tah meñ

kitnī hī sard aur be-amāñ rāteñ guzārī haiñ

merī har soch kī pagDanDī par

tumhāre hī qadmoñ ke nishān the

ye sach hai

par aaj

aaj mere siine kī bosīda dīvāroñ par

kuchh aur saa.e reñg rahe haiñ

tumheñ yaad hai ham ne

apne hisse kī ḳhushiyoñ se

ek chhoTā sā kachchā sā ghar banāyā thā

aaj us kī dīvāreñ sarak rahī haiñ

mujhe mu'āf kar denā

aaj mere paas tumhārī zulfoñ ke saa.e meñ

chhupne kī gunjā.ish nahīñ hai

bāhar saḌak par

un logoñ kī bhiiḌ hai

jin ke chehroñ par vaqt ne

jalī huī roTiyoñ kī kālak mal dī hai

jin kī āñkhoñ kī putliyoñ meñ

mustaqbil kisī purānī gandī chādar kī tarah

lipTā huā hai

jab maiñ tumhārī maḳhmalī hatheliyoñ ko chhūtā huuñ to

mujhe un ke khurdure kaTe hue haath

apnī gardan par chubhte mahsūs hote haiñ

un lamhoñ kā ḳhamīr kyā hai

jo ham akele meñ hañs kar guzārte haiñ

shāyad un ke pīchhe

bahut se gūñge logoñ kī

an-sunī chīḳheñ chunī huī haiñ

aaj mujhe apnī zaat ke ḳhol se

bāhar khaḌā rahne do

merī ḳhāmoshī ko aaj nauha banñe do

mere chehre par jamī ye raakh

aaj mat jhāḌnā

aaj kī raat

mere sir.hāne koī gulāb na rakhnā

merī āñkhoñ kī putliyoñ meñ

kuchh uḌtī huī dhuul jam ga.ī hai

aur us dhuul meñ

mohabbat ke ḳhad-o-ḳhāl

bahut dhuñdle haiñ

yun na dekho mujhe

jaise mere hathon se

koi bahut qimti aabgina chhuT gaya ho

han

main ne barson tumhaari sanson ki lau se

apne kamre ka andhera kaTa hai

tumhaari baaton ki narm tah mein

kitni hi sard aur be-aman raaten guzari hain

meri har soch ki pagDanDi par

tumhaare hi qadmon ke nishan the

ye sach hai

par aaj

aaj mere sine ki bosida diwaron par

kuchh aur sae reng rahe hain

tumhein yaad hai hum ne

apne hisse ki KHushiyon se

ek chhoTa sa kachcha sa ghar banaya tha

aaj us ki diwaren sarak rahi hain

mujhe mu'af kar dena

aaj mere pas tumhaari zulfon ke sae mein

chhupne ki gunjaish nahin hai

bahar saDak par

un logon ki bhiD hai

jin ke chehron par waqt ne

jali hui roTiyon ki kalak mal di hai

jin ki aankhon ki putliyon mein

mustaqbil kisi purani gandi chadar ki tarah

lipTa hua hai

jab main tumhaari maKHmali hatheliyon ko chhuta hun to

mujhe un ke khurdure kaTe hue hath

apni gardan par chubhte mahsus hote hain

un lamhon ka KHamir kya hai

jo hum akele mein hans kar guzarte hain

shayad un ke pichhe

bahut se gunge logon ki

an-suni chiKHen chuni hui hain

aaj mujhe apni zat ke KHol se

bahar khaDa rahne do

meri KHamoshi ko aaj nauha banne do

mere chehre par jami ye rakh

aaj mat jhaDna

aaj ki raat

mere sirhane koi gulab na rakhna

meri aankhon ki putliyon mein

kuchh uDti hui dhul jam gai hai

aur us dhul mein

mohabbat ke KHad-o-KHal

bahut dhundle hain