self made

ġhubār-e-jāñ meñ shu'ūr jis dam panap rahā thā

ye raaz mujh par 'ayāñ huā thā

ki reza reza maiñ ḳhud ko apne hī bāzuoñ se uThā rahā huuñ

na-jāne kaise

baġhair dekhe maiñ apnī āñkheñ banā rahā huuñ

maiñ zindagānī ke chaak par ik adhūrā kuuza

jo aap apnā hī kūza-gar thā

to ḳhud ko taḳhlīq kaise kartā

maiñ apnī tashkīl kaise kartā

mirī banāvaT ke marhaloñ meñ

na koī dast-e-hunar hai shāmil

mire taḳhayyul ke aa.ine meñ

na koī sūrat mire muqābil

jahāñ taġhayyur ke silsile the

bikhar rahe the mire 'anāsir

koī nahīñ thā

koī nahīñ thā jo shaḳhsiyat ke shigāf bhartā

tarāziyat ke nuqūsh ghaḌtā

kaf-e-mahārat kī ek jumbish

mirī shabāhat ubhār detī

ye ḳhaam paikar sañvār detī

magar vo jazba ki jis ne mujh ko

ye ḳhaam paikar sañvārne meñ fa'āl rakkhā

vujūd merā sañbhāl rakkhā

ki maiñ ne ḳhud ko tarāsh Daalā

ḳhud aap apne qayās hī par

baqā ke vāze' javāz hī par

maiñ ḳhud-garī meñ kisī bahāne se koī tāḳhīr kaise kartā

maiñ ḳhvāb rahtā to ḳhvāb tā'bīr kaise kartā

ye chāk-e-gardish thamī to mujh ko gumān guzrā

maiñ an-banā sā hī rah gayā huuñ

magar nigāheñ uThīñ to dekhā

vo saare kuuze

hunar-varī kī jo dastaras meñ zuhūr paa.e

jamāliyātī kasak to vo bhī liye hue haiñ

paye taqābul meñ apnī tazlīl kaise kartā

maiñ ḳhud pe tanqīd kaise kartā

so aaj jo kuchh bhī ban gayā huuñ

agarche auroñ se kuchh judā huuñ

maiñ apnī sochoñ kā aa.ina huuñ

maiñ apnī mehnat kā ḳhud sila huuñ

maiñ zindagānī ke chaak par be-misāl kuuza

jo aap apnā hī kūza-gar hai

ghubar-e-jaan mein shu'ur jis dam panap raha tha

ye raaz mujh par 'ayan hua tha

ki reza reza main KHud ko apne hi bazuon se uTha raha hun

na-jaane kaise

baghair dekhe main apni aankhen bana raha hun

main zindagani ke chaak par ek adhura kuza

jo aap apna hi kuza-gar tha

to KHud ko taKHliq kaise karta

main apni tashkil kaise karta

meri banawaT ke marhalon mein

na koi dast-e-hunar hai shamil

mere taKHayyul ke aaine mein

na koi surat mere muqabil

jahan taghayyur ke silsile the

bikhar rahe the mere 'anasir

koi nahin tha

koi nahin tha jo shaKHsiyat ke shigaf bharta

taraaziyat ke nuqush ghaDta

kaf-e-mahaarat ki ek jumbish

meri shabahat ubhaar deti

ye KHam paikar sanwar deti

magar wo jazba ki jis ne mujh ko

ye KHam paikar sanwarne mein fa'al rakkha

wujud mera sanbhaal rakkha

ki main ne KHud ko tarash Dala

KHud aap apne qayas hi par

baqa ke waze' jawaz hi par

main KHud-gari mein kisi bahane se koi taKHir kaise karta

main KHwab rahta to KHwab ta'bir kaise karta

ye chaak-e-gardish thami to mujh ko guman guzra

main an-bana sa hi rah gaya hun

magar nigahen uThin to dekha

wo sare kuze

hunar-wari ki jo dastaras mein zuhur pae

jamaliyati kasak to wo bhi liye hue hain

paye taqabul mein apni tazlil kaise karta

main KHud pe tanqid kaise karta

so aaj jo kuchh bhi ban gaya hun

agarche auron se kuchh juda hun

main apni sochon ka aaina hun

main apni mehnat ka KHud sila hun

main zindagani ke chaak par be-misal kuza

jo aap apna hi kuza-gar hai