yahan main nahin hun

yahāñ maiñ nahīñ huuñ

mujhe ghar se nikle hue ik zamāna huā hai

ka.ī saal guzre

mujhe dāman-e-koh se

chand mānūs qadmoñ kī āvāz aa.ī

pur-asrār ābādiyoñ ke kisī ghar meñ kānoñ ne

ik 'ambarīñ haath kī koī mālūf dastak sunī thī

magar dūsrī shab mujhe apne ḳhūñ-gashta paaoñ kisī rah-guzar par mile the

magar hoñT mere sile the

hasīnān-e-'ambar-zavā.ib se duurī meñ insāniyyat kī baqā hai

bañdhā huuñ yahīñ par

vo āvāz sun kar bhī apne dukhoñ ke tavele se niklā nahīñ huuñ

yahāñ maiñ nahīñ huuñ

mujhe ghar se nikle hue ik zamāna huā hai

mujhe jānte ho

abhī tak yahīñ huuñ

maiñ bāzār-e-tahzīb kā mo'jiza huuñ

mire zamzamoñ meñ

kahīñ rang-o-āhang bhī aa ga.e haiñ

mire sar pe be-mehr aur be-murād āsmāñ hai

ki pairoñ tale ik sitamgar zamīñ hai

zamīñ bhī kahīñ hai

hama muqtadar hastiyāñ mere madd-e-muqābil

qila-bandiyoñ meñ ulajhne lagī haiñ

tumheñ kyuuñ dikhā.ī nahīñ de rahī haiñ

abhī tak yahīñ huuñ

magar maiñ nahīñ huuñ

kahīñ gum-shuda bastiyoñ ke fusūñ-sāz rastoñ meñ

ik nuqra.ī asp-e-tāza pe baiThā huā maiñ

sehr aur afsūñ ke sab zābte DhūñDtā huuñ

thake-māñde 'ayyāsh logoñ ke jīvan meñ phailī karāhat-zada dostī aur mohabbat kī mā'sūmiyat se bharī zindagī ke hasīñ rābte DhūñDtā huuñ

aur is ġham-kade meñ

mire ġham kī maarī

vo kundan kuñvārī

vo naarī aur us ke hasīñ ras bhare hoñT

maiñ jin kī ḳhātir ka.ī saal mar mar ke jiitā rahā huuñ

unhīñ surḳh hoñToñ ke ras ko baras-hā-baras

jashn-e-nauroz par ek tonic kī sūrat meñ piitā rahā huuñ

kahāñ hai vo naarī mire ġham kī maarī

maiñ kaḌiyal javān aur vo kundan kuñvārī

maiñ kundan-kuñvārī ke husn-e-garāñ-māya kī dā'vat-e-be-bahā par bhī apne ġhamoñ ke jhamele se niklā nahīñ huuñ

yahāñ maiñ nahīñ huuñ

mujhe ghar se nikle hue ik zamāna huā hai

yahan main nahin hun

mujhe ghar se nikle hue ek zamana hua hai

kai sal guzre

mujhe daman-e-koh se

chand manus qadmon ki aawaz aai

pur-asrar aabaadiyon ke kisi ghar mein kanon ne

ek 'ambarin hath ki koi maluf dastak suni thi

magar dusri shab mujhe apne KHun-gashta paon kisi rah-guzar par mile the

magar honT mere sile the

hasinan-e-'ambar-zawaib se duri mein insaniyyat ki baqa hai

bandha hun yahin par

wo aawaz sun kar bhi apne dukhon ke tawele se nikla nahin hun

yahan main nahin hun

mujhe ghar se nikle hue ek zamana hua hai

mujhe jaante ho

abhi tak yahin hun

main bazar-e-tahzib ka mo'jiza hun

mere zamzamon mein

kahin rang-o-ahang bhi aa gae hain

mere sar pe be-mehr aur be-murad aasman hai

ki pairon tale ek sitamgar zamin hai

zamin bhi kahin hai

hama muqtadar hastiyan mere madd-e-muqabil

qila-bandiyon mein ulajhne lagi hain

tumhein kyun dikhai nahin de rahi hain

abhi tak yahin hun

magar main nahin hun

kahin gum-shuda bastiyon ke fusun-saz raston mein

ek nuqrai asp-e-taza pe baiTha hua main

sehr aur afsun ke sab zabte DhunDta hun

thake-mande 'ayyash logon ke jiwan mein phaili karahat-zada dosti aur mohabbat ki ma'sumiyat se bhari zindagi ke hasin rabte DhunDta hun

aur is gham-kade mein

mere gham ki mari

wo kundan kunwari

wo nari aur us ke hasin ras bhare honT

main jin ki KHatir kai sal mar mar ke jita raha hun

unhin surKH honTon ke ras ko baras-ha-baras

jashn-e-nauroz par ek tonic ki surat mein pita raha hun

kahan hai wo nari mere gham ki mari

main kaDiyal jawan aur wo kundan kunwari

main kundan-kunwari ke husn-e-garan-maya ki da'wat-e-be-baha par bhi apne ghamon ke jhamele se nikla nahin hun

yahan main nahin hun

mujhe ghar se nikle hue ek zamana hua hai