shajar hijr aur main

tumhārā rāsta dekhā hai maiñ ne kitne sāloñ tak

magar tum ḳhvāb meñ aa.e haqīqat kyuuñ na ban paa.e

tumhāre din-ba-din paiġhām bhī aate rahe the bas

magar tum to nahīñ aa.e

bhalā kaisī mohabbat hai

jo afsurda hai dil merā

sabab is kā to bas tum ho

mujhe tanhā.iyoñ se 'ishq hone lag gayā thā phir

tumhāre hijr meñ tanhā maiñ ḳhud ko kar ga.ī be-had

tumheñ maiñ kaise apnā haal apnī kaifiyat kahtī

bahut be-kaif the din aur thiiñ be-ḳhvāb sī rāteñ

sahar-ḳhezī kī 'ādat jo na lagtī aur kyā hotā

achānak ghar se maiñ niklī

qadam ḳhud chal rahe the aur maiñ be-ḳhud tabī'at thī

mire ghar se hī thoḌī duur thā pyārā sā bāġhīcha

jahāñ maiñ roz jaatī thī

aur us bāġhīche meñ ik bench par maiñ baiTh jaatī thī

usī pūrab kī jānib ek phūloñ kā shajar bhī thā

nazar us par paḌī to yuuñ lagā vo baat kartā hai

maiñ us kī samt khiñchtī kyuuñ ga.ī hairat meñ thī

maiñ bhī

maiñ ik Tak us ko dekhe jā rahī thī phir achānak se

mujhe aisā lagā ki us ne pūchhā kaun ho pyārī

maiñ nam āñkhoñ se muskā.ī kahā huuñ sinf-e-nāzuk maiñ

magar itnī hī bedardī se us ne dil ko toḌā hai

sunāne meñ lagī phir us ko apnā saarā hāl-e-dil

shajar kī shakl meñ mohsin milā thā baa'd muddat ke

bahut hī ḳhūb-sūrat silsila har roz chal niklā

maiñ jis se baiTh kar kartī hī rahtī thī tirī bāteñ

musalsal jo mire har ġham meñ mere saath rahtā thā

taḌap merī mire aañsū sabhī mahsūs kartā thā

havā ke saath us ne jhūmnā bhī tark kar Daalā

aur us ne shāḳh se apne sabhī patte girā Daale

mire har dard se dil apnā bhārī kar liyā us ne

mire ġham ko bhī us ne ḳhud pe taarī kar liyā jaise

maiñ apnī har ḳhushī har ġham ko us se bāñTtī aa.ī

maiñ tere hijr meñ is baar tanhā thī nahīñ jānāñ

shajar ne bhī to mere saath terā hijr kaaTā hai

tumhaara rasta dekha hai main ne kitne salon tak

magar tum KHwab mein aae haqiqat kyun na ban pae

tumhaare din-ba-din paigham bhi aate rahe the bas

magar tum to nahin aae

bhala kaisi mohabbat hai

jo afsurda hai dil mera

sabab is ka to bas tum ho

mujhe tanhaiyon se 'ishq hone lag gaya tha phir

tumhaare hijr mein tanha main KHud ko kar gai be-had

tumhein main kaise apna haal apni kaifiyat kahti

bahut be-kaif the din aur thin be-KHwab si raaten

sahar-KHezi ki 'adat jo na lagti aur kya hota

achanak ghar se main nikli

qadam KHud chal rahe the aur main be-KHud tabi'at thi

mere ghar se hi thoDi dur tha pyara sa baghicha

jahan main roz jati thi

aur us baghiche mein ek bench par main baiTh jati thi

usi purab ki jaanib ek phulon ka shajar bhi tha

nazar us par paDi to yun laga wo baat karta hai

main us ki samt khinchti kyun gai hairat mein thi

main bhi

main ek Tak us ko dekhe ja rahi thi phir achanak se

mujhe aisa laga ki us ne puchha kaun ho pyari

main nam aankhon se muskai kaha hun sinf-e-nazuk main

magar itni hi bedardi se us ne dil ko toDa hai

sunane mein lagi phir us ko apna sara haal-e-dil

shajar ki shakl mein mohsin mila tha ba'd muddat ke

bahut hi KHub-surat silsila har roz chal nikla

main jis se baiTh kar karti hi rahti thi teri baaten

musalsal jo mere har gham mein mere sath rahta tha

taDap meri mere aansu sabhi mahsus karta tha

hawa ke sath us ne jhumna bhi tark kar Dala

aur us ne shaKH se apne sabhi patte gira Dale

mere har dard se dil apna bhaari kar liya us ne

mere gham ko bhi us ne KHud pe tari kar liya jaise

main apni har KHushi har gham ko us se banTti aai

main tere hijr mein is bar tanha thi nahin jaanan

shajar ne bhi to mere sath tera hijr kaTa hai