nazm

jab kabhī tujh ko ḳhayālāt meñ le aatā huuñ

jaane kyuuñ ḳhud hī pareshān sā ho jaatā huuñ

kyā guzartī hai mire dil pe batā.ūñ kis ko

jaise mujrim huuñ yahī soch ke ghabrātā huuñ

dil to kahtā hai ki āñkhoñ meñ samā jā.ūñ tirī

par karūñ kyā na karūñ kuchh na samajh paatā huuñ

tū mire fikr-o-ḳhayālāt meñ rahtī hai magar

soch kar maiñ kisī anjām se Dar jaatā huuñ

jaisī duniyā hai tirī vaisā hī sansār merā

vasl mumkin hī nahīñ ye tujhe samjhātā huuñ

tujh ko mā'lūm hai majbūriyāñ merī kyā haiñ

maiñ hadeñ dekh ke ḳhud terī laraz jaatā huuñ

terī nagrī hai alag merā bhī qarya hai judā

tū kisī kī maiñ kahīñ aur ginā jaatā huuñ

kaise chāhūñgā tū dahlīz hayā kī lāñghe

bas yahī soch ke to tujh se maiñ katrātā huuñ

dost ban jaa.eñ chaleñ ziist sañvāreñ apnī

maiñ bhī bā-zarf huuñ tujh meñ bhī hayā paatā huuñ

jab kabhi tujh ko KHayalat mein le aata hun

jaane kyun KHud hi pareshan sa ho jata hun

kya guzarti hai mere dil pe bataun kis ko

jaise mujrim hun yahi soch ke ghabraata hun

dil to kahta hai ki aankhon mein sama jaun teri

par karun kya na karun kuchh na samajh pata hun

tu mere fikr-o-KHayalat mein rahti hai magar

soch kar main kisi anjam se Dar jata hun

jaisi duniya hai teri waisa hi sansar mera

wasl mumkin hi nahin ye tujhe samjhata hun

tujh ko ma'lum hai majburiyan meri kya hain

main haden dekh ke KHud teri laraz jata hun

teri nagri hai alag mera bhi qarya hai juda

tu kisi ki main kahin aur gina jata hun

kaise chahunga tu dahliz haya ki langhe

bas yahi soch ke to tujh se main katraata hun

dost ban jaen chalen zist sanwaren apni

main bhi ba-zarf hun tujh mein bhi haya pata hun