nazm

terī āñkhoñ meñ sahar hañstī thī

tere hoñToñ pe mahakte the gulāb

terī har saañs meñ chaltī thī nasīm

terī zulfoñ meñ machaltī thī ziyā-e-mahtāb

dil meñ ik huuk uThī

kaash maiñ apnā banā luuñ tujh ko

ḳhalish-e-rūh ko āsūda karūñ

jism-e-sozāñ se lagā luuñ tujh ko

safar-e-shauq meñ maujoñ kī tarah saath rahe

haath meñ haath rahe

ham siyah-rāt kī pahnā.ī meñ

do sitāre the magar ek hue

dard ne dard ko ham-rāz kiyā

ashk ashkoñ se mile dīda-e-tar ek hue

ab tirā ġham na tirā hai na mirā ġham merā

ek ġham hai jo hamārā ġham hai

ġham-e-insāñ hai jahāñ kā ġham hai

teri aankhon mein sahar hansti thi

tere honTon pe mahakte the gulab

teri har sans mein chalti thi nasim

teri zulfon mein machalti thi ziya-e-mahtab

dil mein ek huk uThi

kash main apna bana lun tujh ko

KHalish-e-ruh ko aasuda karun

jism-e-sozan se laga lun tujh ko

safar-e-shauq mein maujon ki tarah sath rahe

hath mein hath rahe

hum siyah-raat ki pahnai mein

do sitare the magar ek hue

dard ne dard ko ham-raaz kiya

ashk ashkon se mile dida-e-tar ek hue

ab tera gham na tera hai na mera gham mera

ek gham hai jo hamara gham hai

gham-e-insan hai jahan ka gham hai