uD rahi hai gard su-e-asman

saikḌoñ sadiyoñ kī ThanDī aag kī chingāriyāñ

jalte bujhte nāchte 'ifrīt kī parchhā.iyāñ

maut kā ḳhāmosh lashkar vaqt kā sail-e-ravāñ

gard-e-qahr-e-āsmāñ ġhārat-gar-e-amn-o-amāñ

reñgte kīḌoñ bharī tārīk getī se janam lene ke baa'd

gard jab phailī to dasht-e-be-sadā mahshar-ba-dosh

aur jab simTī to alvand-o-himāla barf-posh

gard vaqt aur maut tīnoñ ham-safar

vaqt kuchh kahtā nahīñ

maut kuchh suntī nahīñ

gard ġharq-e-lazzat-e-kām-o-dahan

sang-o-āhan ke jigar par us ke changul ke nishāñ

peḌ paude adh-khilī kaliyāñ shagufta phuul sūkhī pattiyāñ

gard meñ Duubī huī kul kā.ināt-e-gulsitāñ

gard vīrānoñ kā raaj

gard dariyāoñ kā taaj

gard zarrīñ dhuup ke sailāb meñ bikhrī huī

gard sīmīñ chāñdnī ke ḳhvāb meñ nikhrī huī

sehn āñgan oltī dīvār pushte sīḌhiyāñ

bām-o-dar mehrāb rauzan jhilmilī

taaq almārī kitābeñ mez sofe kursiyāñ

tauliyā kapḌe kī khūñTī aa.ina chehre kā 'aks

refrigerator radio guldān tasvīreñ ghaḌī parde calendar sab pe gard

ḳhān-qāheñ madrase dānish-kade

rahnumā rah-gīr rahzan rāste

gard kī chādar meñ sab lipTe hue

gard meñ tār-e-nafas tār-e-nazar uljhe hue

gard jallādoñ kā ḳhanjar gard maqtūloñ kā ḳhuun

gard meñ namrūd gum hajjāj gum hallāj gum

nainvā yūnān bābul somnāt

har baḌe fāteh ke pīchhe gard kā ik kārvāñ

gard qaum-e-‘ād koh-e-dādī-o-rīhul'aqīm

gard 'ilm-e-ḳhizr-o-dīvār-e-yatīm

gard shahr-e-lūt balsan hiroshima auschwitz

phir bhī baḌhtī gūñjtī ābādiyāñ

shams-pāro anjum-o-sīmāb-paikar dā.irū

ye zamīñ ye murda sayyāra ye tīra-ḳhāk-dāñ

is kī peshānī pe likh kar ḳhāk-o-ḳhūñ kī dāstāñ

uḌ rahī hai gard sū-e-āsmāñ

saikDon sadiyon ki ThanDi aag ki chingariyan

jalte bujhte nachte 'ifrit ki parchhaiyan

maut ka KHamosh lashkar waqt ka sail-e-rawan

gard-e-qahr-e-asman ghaarat-gar-e-amn-o-aman

rengte kiDon bhari tarik geti se janam lene ke ba'd

gard jab phaili to dasht-e-be-sada mahshar-ba-dosh

aur jab simTi to alwand-o-himala barf-posh

gard waqt aur maut tinon ham-safar

waqt kuchh kahta nahin

maut kuchh sunti nahin

gard gharq-e-lazzat-e-kaam-o-dahan

sang-o-ahan ke jigar par us ke changul ke nishan

peD paude adh-khili kaliyan shagufta phul sukhi pattiyan

gard mein Dubi hui kul kainat-e-gulsitan

gard viranon ka raj

gard dariyaon ka taj

gard zarrin dhup ke sailab mein bikhri hui

gard simin chandni ke KHwab mein nikhri hui

sehn aangan olti diwar pushte siDhiyan

baam-o-dar mehrab rauzan jhilmili

taq almari kitaben mez sofe kursiyan

tauliya kapDe ki khunTi aaina chehre ka 'aks

refrigerator radio guldan taswiren ghaDi parde calendar sab pe gard

KHan-qahen madrase danish-kade

rahnuma rah-gir rahzan raste

gard ki chadar mein sab lipTe hue

gard mein tar-e-nafas tar-e-nazar uljhe hue

gard jalladon ka KHanjar gard maqtulon ka KHun

gard mein namrud gum hajjaj gum hallaj gum

nainwa yunan babul somnat

har baDe fateh ke pichhe gard ka ek karwan

gard qaum-e-‘ad koh-e-dadi-o-rihul'aqim

gard 'ilm-e-KHizr-o-diwar-e-yatim

gard shahr-e-lut balsan hiroshima auschwitz

phir bhi baDhti gunjti aabaadiyan

shams-paro anjum-o-simab-paikar dairu

ye zamin ye murda sayyara ye tira-KHak-dan

is ki peshani pe likh kar KHak-o-KHun ki dastan

uD rahi hai gard su-e-asman