walid-e-girami

ye vo chehra hai jise maiñ ne paḌhā hai barsoñ

dūsrī koī kitāb aisī na dekhī maiñ ne

is kī tasvīr-kashī mujh se na ho pā.egī

harf aise haiñ ki dhāge meñ piro.e motī

lafz-dar-lafz vo hikmat hai ki sub.hān-allāh

is ke fiqroñ meñ hai ābād jahān-e-mā'nī

is kī har satar hai majmū'a-e-asrār-e-nujūm

jo ki ahvāl batā detī hai mustaqbil kā

is ke safhāt nigāhoñ ke liye ThanDak haiñ

is ne duniyā kī chakā-chauñd se āgāh kiyā

is ne bhaTkāyā nahīñ rāh-numā.ī kī hai

is ne apnoñ ke taġhāful kā sitam jhelā hai

phir bhī ye fā.ida pahuñchātī rahī hai sab ko

haañ magar shikva-kunāñ ye kabhī dekhī na ga.ī

āñdhiyāñ aa.iiñ to ālām-o-havādis kī magar

is ke dāman ko magar kar na sakīñ gard-ālūd

aaj bhī is kī tab-o-tāb vahī hai jo ki thī

lillahil-hamd ki us ne mujhe baḳhshī ye kitāb

ye du'ā hai ki salāmat rahe is kī tab-o-tāb

hai guzārish ise paḌh kar kaheñ āmīn ahbāb

ye wo chehra hai jise main ne paDha hai barson

dusri koi kitab aisi na dekhi main ne

is ki taswir-kashi mujh se na ho paegi

harf aise hain ki dhage mein piroe moti

lafz-dar-lafz wo hikmat hai ki subhan-allah

is ke fiqron mein hai aabaad jahan-e-ma'ni

is ki har satar hai majmu'a-e-asrar-e-nujum

jo ki ahwal bata deti hai mustaqbil ka

is ke safhat nigahon ke liye ThanDak hain

is ne duniya ki chaka-chaund se aagah kiya

is ne bhaTkaya nahin rah-numai ki hai

is ne apnon ke taghaful ka sitam jhela hai

phir bhi ye faida pahunchati rahi hai sab ko

han magar shikwa-kunan ye kabhi dekhi na gai

aandhiyan aain to aalam-o-hawadis ki magar

is ke daman ko magar kar na sakin gard-alud

aaj bhi is ki tab-o-tab wahi hai jo ki thi

lillahil-hamd ki us ne mujhe baKHshi ye kitab

ye du'a hai ki salamat rahe is ki tab-o-tab

hai guzarish ise paDh kar kahen aamin ahbab