eid ka chand dekh kar

sub.h ḳhairāt ke āñgan meñ ġharībī hogī

phir vahī sadqa-e-jāñ ab ke baras pā.eñge

aur har dast-e-muḳhayyar meñ chamakte sikke

malgaje jismoñ kī hālat pe taras khā.eñge

ġham ke tapte hue sahrā pe ḳhushī ke bādal

be-irāda hī sar-e-rāh baras jā.eñge

tīra-baḳhtī kī muñDeroñ pe umīdoñ ke charāġh

phir ra.ūnat kī havāoñ se jilā māñgeñge

bhuuk kī gard meñ lipTe hue sīmīñ paikar

nang-e-ehsās sa.ūbat se qabā māñgeñge

phir havas-jū kisī adh-nangī javānī kī taraf

apnī pheñkī huī chādar kā sila māñgeñge

fāqa-mastī hī muqaddar hai to āḳhir ik din

peT kī aag bujhāne kī zarūrat kyā hai

sāl-hā-sāl kī bosīda rivāyat ke evaz

daulat-e-ġham ko luTāne kī zarūrat kyā hai

bhiik ke paisoñ ko dastār-e-anā meñ rakh kar

sāthiyo eid manāne kī zarūrat kyā hai

aur agar eid manānā hai to jān-e-ġhurbat

sang-e-mehnat se ye kashkol-e-zalālat toḌo

bhiik par jiine se behtar hai ḳhudī par marnā

ye hisār-e-ravish-e-ahl-e-ināyat toḌo

māh-e-qurāñ ke fazā.el kī qasam hai tum ko

aaj ḳhairāt pe jiine kī rivāyat toḌo

subh KHairaat ke aangan mein gharibi hogi

phir wahi sadqa-e-jaan ab ke baras paenge

aur har dast-e-muKHayyar mein chamakte sikke

malgaje jismon ki haalat pe taras khaenge

gham ke tapte hue sahra pe KHushi ke baadal

be-irada hi sar-e-rah baras jaenge

tira-baKHti ki munDeron pe umidon ke charagh

phir raunat ki hawaon se jila mangenge

bhuk ki gard mein lipTe hue simin paikar

nang-e-ehsas saubat se qaba mangenge

phir hawas-ju kisi adh-nangi jawani ki taraf

apni phenki hui chadar ka sila mangenge

faqa-masti hi muqaddar hai to aaKHir ek din

peT ki aag bujhane ki zarurat kya hai

sal-ha-sal ki bosida riwayat ke ewaz

daulat-e-gham ko luTane ki zarurat kya hai

bhik ke paison ko dastar-e-ana mein rakh kar

sathiyo eid manane ki zarurat kya hai

aur agar eid manana hai to jaan-e-ghurbat

sang-e-mehnat se ye kashkol-e-zalalat toDo

bhik par jine se behtar hai KHudi par marna

ye hisar-e-rawish-e-ahl-e-inayat toDo

mah-e-quran ke fazael ki qasam hai tum ko

aaj KHairaat pe jine ki riwayat toDo