jazb-o-gurez

rū-barū ho ke bhī nazreñ na milā.īñ us ne

apnī roī huī āñkhoñ ko chhupānā chāhā

haa.e vo kaifiyat-e-'ijz ba-hangām-e-salām

us sar-afrāz ne jab sar ko jhukānā chāhā

seep sī uñgliyāñ tharrā.eñ jabīñ sard huī

jaise sar-tā-ba-qadam mujh meñ samānā chāhā

zer-e-dāmān-e-hayā sham' jalānī chāhī

naaz farmāte hue naaz uThānā chāhā

suḳhan-e-lutf ko sargoshī kā darja de kar

tā-ba-imkāñ mujhe nazdīk bulānā chāhā

lailā-e-najd-e-dakan jān-e-vatan rūh-e-suḳhan

ġham ko mahmil na samajh 'ishq ko pardā na banā

mahr ko chuur na kar maah ko be-nūr na kar

niiñd ko zaḳhm na de ḳhvāb ko dhaḌkā na banā

lahn ko soz na de saaz pe mizrāb na rakh

saañs ko aah na kar fikr ko naġhma na banā

ruup ko dhuup na de rang ko sho'la na dikhā

dar ko dīvār na kar sang ko shīsha na banā

tū ki ḳhalvat meñ rahe anjuman-ārā ban kar

mujh ko bazār hī rahne de tamāshā na banā

ru-baru ho ke bhi nazren na milain us ne

apni roi hui aankhon ko chhupana chaha

hae wo kaifiyat-e-'ijz ba-hangam-e-salam

us sar-afraaz ne jab sar ko jhukana chaha

seep si ungliyan tharraen jabin sard hui

jaise sar-ta-ba-qadam mujh mein samana chaha

zer-e-daman-e-haya sham' jalani chahi

naz farmate hue naz uThana chaha

suKHan-e-lutf ko sargoshi ka darja de kar

ta-ba-imkan mujhe nazdik bulana chaha

laila-e-najd-e-dakan jaan-e-watan ruh-e-suKHan

gham ko mahmil na samajh 'ishq ko parda na bana

mahr ko chur na kar mah ko be-nur na kar

nind ko zaKHm na de KHwab ko dhaDka na bana

lahn ko soz na de saz pe mizrab na rakh

sans ko aah na kar fikr ko naghma na bana

rup ko dhup na de rang ko sho'la na dikha

dar ko diwar na kar sang ko shisha na bana

tu ki KHalwat mein rahe anjuman-ara ban kar

mujh ko bazar hi rahne de tamasha na bana