patthar ke insan

pahāḌoñ ke sangīn asrār

gahre ghane jangaloñ ke parat-dār phaile hue silsile haiñ

kahīñ in meñ tum kho na jaanā

bulandī kī jānib

nigāhoñ kī had se nikaltī huī Duubī pagDanDiyo

ūñchī gahrā.iyoñ meñ simaTtī huī phailī chup ghāTiyo

peḌ kī jaḌ kī mānind

dhartī kī tārīk pahnā.iyoñ meñ salābat kī tābindagī kā vo gambhīr jauhar

jo mazbūt phailā huā gahrā aur sar-bar-āvarda hai

ham pahāḌoñ ke kamzor aur nā-ḳhalaf beToñ kā ek sarmāya-e-burda hai

apnī be-rang fitrat kī be-kaif āvārgī kī sakat

in pahāḌoñ kī jaltī sulagtī huī os kī narm yaḳh-basta chingāriyāñ

in zamīnoñ kī terah tahoñ kī namī se bharī ḳhushkiyoñ kī ḳhunuk garmiyāñ

jin se is zindagī meñ tavānā.ī ke husn kī raushnī hai

zamāna huā kho chukī hai

zamāna huā ham pareshān hairān

sar par tane ḳhushk nā-mehrbān āsmāñ ke tale

ūñche ūñche pahāḌoñ ke be-āb phaile hue dāmanoñ meñ khaḌe

jāhiloñ kī tarah

apnī taqdīr ke nauha-ḳhvāñ

ham vo patthar ke zī-rūh but haiñ

zamāna jinheñ 'ibratoñ ke liye ḳhud meñ mahfūz rakhtā hai

ham ne to apne liye kar liyā hai harām

avvalīñ roz se

ḳhud ko paanā

pahāḌoñ ke sangīn asrār

gahre ghane jangaloñ ke parat-dār phaile hue silsile haiñ

kahīñ in meñ tum kho na jaanā

pahaDon ke sangin asrar

gahre ghane jangalon ke parat-dar phaile hue silsile hain

kahin in mein tum kho na jaana

bulandi ki jaanib

nigahon ki had se nikalti hui Dubi pagDanDiyo

unchi gahraiyon mein simaTti hui phaili chup ghaTiyo

peD ki jaD ki manind

dharti ki tarik pahnaiyon mein salabat ki tabindagi ka wo gambhir jauhar

jo mazbut phaila hua gahra aur sar-bar-awarda hai

hum pahaDon ke kamzor aur na-KHalaf beTon ka ek sarmaya-e-burda hai

apni be-rang fitrat ki be-kaif aawargi ki sakat

in pahaDon ki jalti sulagti hui os ki narm yaKH-basta chingariyan

in zaminon ki terah tahon ki nami se bhari KHushkiyon ki KHunuk garmiyan

jin se is zindagi mein tawanai ke husn ki raushni hai

zamana hua kho chuki hai

zamana hua hum pareshan hairan

sar par tane KHushk na-mehrban aasman ke tale

unche unche pahaDon ke be-ab phaile hue damanon mein khaDe

jahilon ki tarah

apni taqdir ke nauha-KHwan

hum wo patthar ke zi-ruh but hain

zamana jinhen 'ibraton ke liye KHud mein mahfuz rakhta hai

hum ne to apne liye kar liya hai haram

awwalin roz se

KHud ko pana

pahaDon ke sangin asrar

gahre ghane jangalon ke parat-dar phaile hue silsile hain

kahin in mein tum kho na jaana