ai KHuda-e-azal

ai ḳhudā-e-azal

ḳhaak zevar kiye

tere majzūb ne

aaj ātish-kade ke bayālis phere mukammal kiye

aaj siine meñ jaise ye dhaḌkan nahīñ

ik talātum bapā hai

ḳhamoshī ke malbe tale dab chuke vo savālāt ab

bojh sahne kī himmat na pā kar

baġhāvat pe majbūr haiñ

aur is kashmakash meñ taḌaptā huā ye badan

jo zamāne se parde kī ḳhātir

faqat intizār-e-abad par hī māmūr hai

kirdgār-e-zamīn-o-zamāñ

ai azal-āshnā

mahfil-e-āb-o-gil hai sajī

raunaq-e-hast meñ 'ishq bhī hai pa.e-bandagī

tū agar sāz-e-būdash pe sur chheḌ de

naġhma-e-marg-o-mahshar kā āġhāz ho

koī sūrat takallum kī ījād ho

kirdgār-e-suḳhan-hā-e-jāñ

ai azal-āshnā

sāz-e-ījād par

ramz kī thaap par

ruuh ko raqs karne kā armān hai

rang meñ rang paḌne kā imkān hai

apne gītoñ meñ manzūm kar de mujhe

apne naġhmoñ se mā'dūm kar de mujhe

maiñ 'adam ke darīche pe aa jā.ūñgā

maiñ ki bas terī qurbat ke gun gā.ūñgā

sāz-o-āvāz ke saat pardoñ meñ gum

rāz-dārī-e-kul ek maiñ ek tum

kirdgār-e-yaqīn-o-gumāñ

ai azal-āshnā

zamzama-hā-e-taḳhlīq se māsivā

ek qissa bhī hai

an-kahā an-sunā

vaqt kī ibtidā

ye mu'amma hai kyā

māvarā-e-azal

tū ki maujūd thā

phir azal kyā huā

qabl az-ibtidā

terī maujūdgī

kis zamānī haqīqat se mansūb hai

merā dil aaj mantiq se maġhlūb hai

duur ho jaa.e ab iltibās-e-ḳhirad

raas aa jaa.e phir ehtimām-e-junūñ

kirdgār-e-rumūz-e-jahāñ

ai azal-āshnā

ai ḳhudā-e-azal

ai ḳhudā-e-abad

ai ḳhudā-e-ajal

ai ajal-āshnā

kun ke sur gungunā

kun ke sur gungunā

ai KHuda-e-azal

KHak zewar kiye

tere majzub ne

aaj aatish-kade ke bayalis phere mukammal kiye

aaj sine mein jaise ye dhaDkan nahin

ek talatum bapa hai

KHamoshi ke malbe tale dab chuke wo sawalat ab

bojh sahne ki himmat na pa kar

baghawat pe majbur hain

aur is kashmakash mein taDapta hua ye badan

jo zamane se parde ki KHatir

faqat intizar-e-abad par hi mamur hai

kirdgar-e-zamin-o-zaman

ai azal-ashna

mahfil-e-ab-o-gil hai saji

raunaq-e-hast mein 'ishq bhi hai pae-bandagi

tu agar saz-e-budash pe sur chheD de

naghma-e-marg-o-mahshar ka aaghaz ho

koi surat takallum ki ijad ho

kirdgar-e-suKHan-ha-e-jaan

ai azal-ashna

saz-e-ijad par

ramz ki thap par

ruh ko raqs karne ka arman hai

rang mein rang paDne ka imkan hai

apne giton mein manzum kar de mujhe

apne naghmon se ma'dum kar de mujhe

main 'adam ke dariche pe aa jaunga

main ki bas teri qurbat ke gun gaunga

saz-o-awaz ke sat pardon mein gum

raaz-dari-e-kul ek main ek tum

kirdgar-e-yaqin-o-guman

ai azal-ashna

zamzama-ha-e-taKHliq se masiwa

ek qissa bhi hai

an-kaha an-suna

waqt ki ibtida

ye mu'amma hai kya

mawara-e-azal

tu ki maujud tha

phir azal kya hua

qabl az-ibtida

teri maujudgi

kis zamani haqiqat se mansub hai

mera dil aaj mantiq se maghlub hai

dur ho jae ab iltibas-e-KHirad

ras aa jae phir ehtimam-e-junun

kirdgar-e-rumuz-e-jahan

ai azal-ashna

ai KHuda-e-azal

ai KHuda-e-abad

ai KHuda-e-ajal

ai ajal-ashna

kun ke sur gunguna

kun ke sur gunguna