riyazat

ham ne is jur.at-e-iz.hār ko denā thā davām

is liye 'umr guzārī hai sar-e-dār-e-kalām

ham ne ik teġh kī asnām-e-taḳhayyul kī harīf

nār-e-ilhām ke siine se nikālī hai radīf

matla' likkhā to rag-e-jāñ se siyāhī māñgī

aur maqte ke liye taaza tabāhī māñgī

apnī luknat ko kiyā husn-e-talaffuz se gazand

kiye rakkhā dar-e-āvurd ke naḳhchīr ko band

sīḳh-e-iz.hār pe rakkhā hai sadā dil kā kabāb

aur matrūk kiyā ḳhud pe har ik jām-e-shabāb

ka.ī gumnām safar-nāmoñ ke pushte khole

vaqt-e-iz.hār rahe chup sar-e-mus.haf bole

kashtiyāñ fikr kī rakkhī haiñ ruvāñ shām-o-sahar

bhuul kar 'ahd-e-mohabbat ke javāñ shām-o-sahar

ḳhvāhish-e-daulat-o-'ishrat ko sabotage kiyā

ġham-e-daurāñ kī rivāyat ko sabotage kiyā

saut ke bad-numā sūraj kī tapish jism pe lī

apne hone kī gavāhī bhī kisī ism pe lī

kunj-e-tanhā.ī meñ paidā kiyā hū kā 'ālam

aur kiyā shorish-e-tafsīr ko har-jā barham

ham ne urdu-e-mu'allā ko 'ibādat samjhā

kaise uThtā hai girāñ-bār-e-tarīqat samjhā

tab kahīñ ham se koī misra' koī she'r huā

tab kahīñ ham se samā'at kā 'adū zer huā

she'r bhī kyā ki faqat dil kī tasallī ke liye

yā ye kahiye ki kisī zauq-e-tajallī ke liye

harf-o-tāsīr ke mābain ye sūrat niklī

nazm kī shakl banī izn kī mūrat niklī

ahl-e-duniyā ne baḌī hausla-afzā.ī kī

baa'z auqāt to dushman ne pazīrā.ī kī

dost ik 'umr lagā kar suḳhan-e'jāz kiyā

ḳhvāb-e-tahrīr ko sharminda-e-āvāz kiyā

phir bhī lagtā hai koī baat bayāñ ho na sakī

she'r nashtar na hue nazm kamāñ ho na sakī

jis tarah gesū-e-ḳhamdār sulajhne kā nahīñ

fā.ida lailā-e-misra' se ulajhne kā nahīñ

hum ne is jurat-e-izhaar ko dena tha dawam

is liye 'umr guzari hai sar-e-dar-e-kalam

hum ne ek tegh ki asnam-e-taKHayyul ki harif

nar-e-ilham ke sine se nikali hai radif

matla' likkha to rag-e-jaan se siyahi mangi

aur maqte ke liye taza tabahi mangi

apni luknat ko kiya husn-e-talaffuz se gazand

kiye rakkha dar-e-awurd ke naKHchir ko band

siKH-e-izhaar pe rakkha hai sada dil ka kabab

aur matruk kiya KHud pe har ek jam-e-shabab

kai gumnam safar-namon ke pushte khole

waqt-e-izhaar rahe chup sar-e-mushaf bole

kashtiyan fikr ki rakkhi hain ruwan sham-o-sahar

bhul kar 'ahd-e-mohabbat ke jawan sham-o-sahar

KHwahish-e-daulat-o-'ishrat ko sabotage kiya

gham-e-dauran ki riwayat ko sabotage kiya

saut ke bad-numa suraj ki tapish jism pe li

apne hone ki gawahi bhi kisi ism pe li

kunj-e-tanhai mein paida kiya hu ka 'alam

aur kiya shorish-e-tafsir ko har-ja barham

hum ne urdu-e-mu'alla ko 'ibaadat samjha

kaise uThta hai giran-bar-e-tariqat samjha

tab kahin hum se koi misra' koi she'r hua

tab kahin hum se sama'at ka 'adu zer hua

she'r bhi kya ki faqat dil ki tasalli ke liye

ya ye kahiye ki kisi zauq-e-tajalli ke liye

harf-o-tasir ke mabain ye surat nikli

nazm ki shakl bani izn ki murat nikli

ahl-e-duniya ne baDi hausla-afzai ki

ba'z auqat to dushman ne pazirai ki

dost ek 'umr laga kar suKHan-e'jaz kiya

KHwab-e-tahrir ko sharminda-e-awaz kiya

phir bhi lagta hai koi baat bayan ho na saki

she'r nashtar na hue nazm kaman ho na saki

jis tarah gesu-e-KHamdar sulajhne ka nahin

faida laila-e-misra' se ulajhne ka nahin