ba-yaad-e-ghaalib

kāġhazī pairahan-e-‘ishq vo e'jāz-navā

vo naqīb-e-abadī nāma-bar-e-shahr-e-vafā

fikr-e-rangīñ tirī pāband-e-mazāhir na huī

majlis-e-rang se āzād rahā duzd-e-hinā

tū ne insān ko baḳhshā vo shu'ūr-e-jāved

aa ga.ī 'adl ke hāthoñ meñ sitam-gar kī qabā

zaḳhm-e-dil tere na the dahr meñ mohtāj-e-rafū

chāk-e-dāmāñ kā patā chāk-e-girebāñ se milā

jab bhī kī nutq ne tere ġham-e-dil kī tafsīr

qatra-e-ḳhūñ kī tarah lab se huā harf judā

fan-e-ā.īna-garī jins hai kam-yāb bahut

'ishq ā.īna-shikan husn hai ā.īna-numā

tū hama 'ishrat-e-ḳhud-raftagī-e-kaif-e-hayāt

chashm-e-maḳhmūr tirī sāġhar-o-mīnā se ḳhafā

sub.h-dam suntī hai gulshan meñ koī rūh-e-jamīl

naġhma-e-gul meñ tire dil ke dhaḌakne kī sadā

lab pe aayā jo tirā misra'-e-ḳhush-rang koī

maiñ ne jaanā ki sar-e-shāḳh koī phuul khilā

partv-e-māh se hai misl-e-katāñ saf.ha-e-dil

ḳhirman-e-barq-zada daftar-e-ash'ār mirā

kaun mahfil meñ ġhazal-ḳhvāñ hai bayād-e-'ġhālib'

gungunātī hai samarqand-o-buḳhārā kī havā

kaghazi pairahan-e-‘ishq wo e'jaz-nawa

wo naqib-e-abadi nama-bar-e-shahr-e-wafa

fikr-e-rangin teri paband-e-mazahir na hui

majlis-e-rang se aazad raha duzd-e-hina

tu ne insan ko baKHsha wo shu'ur-e-jawed

aa gai 'adl ke hathon mein sitam-gar ki qaba

zaKHm-e-dil tere na the dahr mein mohtaj-e-rafu

chaak-e-daman ka pata chaak-e-gireban se mila

jab bhi ki nutq ne tere gham-e-dil ki tafsir

qatra-e-KHun ki tarah lab se hua harf juda

fan-e-aina-gari jins hai kam-yab bahut

'ishq aaina-shikan husn hai aaina-numa

tu hama 'ishrat-e-KHud-raftagi-e-kaif-e-hayat

chashm-e-maKHmur teri saghar-o-mina se KHafa

subh-dam sunti hai gulshan mein koi ruh-e-jamil

naghma-e-gul mein tere dil ke dhaDakne ki sada

lab pe aaya jo tera misra'-e-KHush-rang koi

main ne jaana ki sar-e-shaKH koi phul khila

partw-e-mah se hai misl-e-katan safha-e-dil

KHirman-e-barq-zada daftar-e-ash'ar mera

kaun mahfil mein ghazal-KHwan hai bayaad-e-'ghaalib'

gungunati hai samarqand-o-buKHara ki hawa