sada-e-watan

zabāñ zabāñ pe har ik nā'ra-e-fidā-e-vatan

chaman meñ guuñj rahī hai yahī sadā-e-vatan

ḳhamīr-e-ahl-e-vatan kyā hai māsivā-e-vatan

ye ḳhāk-hā-e-vatan hai ye ḳhāk-hā-e-vatan

tamām qaumoñ kī gang-o-jaman kā ik sangam

barīñ lihāz muqaddam sī hai razā-e-vatan

milī hai jo baḌī qurbāniyoñ se āzādī

vahī hai husn kī devī ye mah-laqā-e-vatan

ye mas.ala bhī haqīqat meñ nafsiyātī hai

rahe vatan meñ koī kaise be-vafā-e-vatan

tamām ne'mateñ is kī haiñ musta'ār us se

to kyoñ na vādī-e-jannat meñ yaad aa.e vatan

nazar nazar ye sar-e-chashm-e-imtiyāz-e-'jamāl'

jamāliyāt se mamlū haiñ jalva-hā-e-vatan

zaban zaban pe har ek na'ra-e-fida-e-watan

chaman mein gunj rahi hai yahi sada-e-watan

KHamir-e-ahl-e-watan kya hai masiwa-e-watan

ye KHak-ha-e-watan hai ye KHak-ha-e-watan

tamam qaumon ki gang-o-jaman ka ek sangam

barin lihaz muqaddam si hai raza-e-watan

mili hai jo baDi qurbaniyon se aazadi

wahi hai husn ki dewi ye mah-laqa-e-watan

ye masala bhi haqiqat mein nafsiyati hai

rahe watan mein koi kaise be-wafa-e-watan

tamam ne'maten is ki hain musta'ar us se

to kyon na wadi-e-jannat mein yaad aae watan

nazar nazar ye sar-e-chashm-e-imtiyaz-e-'jamal'

jamaliyat se mamlu hain jalwa-ha-e-watan