sar-e-sham

Dūbte sūraj ko āḳhir Dūbnā hai

tum to us ke saath mat Duubo mire dil

Duub kar ye manziloñ maarā thakā haarā musāfir

sub.h-dam

ek fāteh kī tarah lauT aa.egā

tum agar Duube mire dil

tum pe aisī raat TūTegī ki tum

bhuul jāoge sahar kā naam bhī

Dūbte sūraj ne shab ko māh-o-anjum se munavvar kar diyā

aur tumhāre paas kyā hai

ārzūeñ hasrateñ lākhoñ tamannā.eñ karoḌoñ ḳhvāhisheñ

jo rahguzār-e-juhd meñ thak haar kar gum ho ga.iiñ

jo āñsūoñ ke ruup meñ dāmān-e-nisyāñ par bikhar kar kho ga.iiñ

āḳhir tumhāre paas kyā hai

muzmahil maġhmūm yādoñ ke sisakte zard-rū maddham diye

vaqt kā jo nā-tavāñ jhoñkā bhī sah sakte nahīñ

tum ne to ik chāñd kyā koī sitāra bhī tarāshā hai barā.e-tīrgī

tum to mat Duubo mire dil

tum to mat Duubo abhī

Dubte suraj ko aaKHir Dubna hai

tum to us ke sath mat Dubo mere dil

Dub kar ye manzilon mara thaka haara musafir

subh-dam

ek fateh ki tarah lauT aaega

tum agar Dube mere dil

tum pe aisi raat TuTegi ki tum

bhul jaoge sahar ka nam bhi

Dubte suraj ne shab ko mah-o-anjum se munawwar kar diya

aur tumhaare pas kya hai

aarzuen hasraten lakhon tamannaen karoDon KHwahishen

jo rahguzar-e-juhd mein thak haar kar gum ho gain

jo aansuon ke rup mein daman-e-nisyan par bikhar kar kho gain

aaKHir tumhaare pas kya hai

muzmahil maghmum yaadon ke sisakte zard-ru maddham diye

waqt ka jo na-tawan jhonka bhi sah sakte nahin

tum ne to ek chand kya koi sitara bhi tarasha hai barae-tirgi

tum to mat Dubo mere dil

tum to mat Dubo abhi