ek nazm ek KHwab

raat gahrī huī

niiñd zahrī huī

apnī zanjīr ko merī taḳh.īl se

toḌ kar chal paḌī baat Thahrī huī

jitne alfāz the

mere afkār ke kunj-e-tamhīd meñ

an-sunī an-kahī tishna-lab baat kā tāziyāna bane

jitne sangīt the

mere jazbāt ke sāz-e-nā-dīd meñ

an-miTī hasratoñ kī laraztī huī be-qarār uñgliyoñ kā nishāna bane

shauq kī raah meñ raushnī kī tarah

naach kar ghuum kar phail kar baj uThīñ

ek be-sūrat naġhme kī parchhā.iyāñ

ruuh kī dhund meñ bastiyoñ kī tarah

dhaḌkaneñ jaag uThīñ le ke añgḌā.iyāñ

dukh ke pathrīle raste pe donoñ taraf

sukh ke kachche gharoñdoñ meñ dīpak jale

haath ik dūsre kā sañbhāle hue

apne jaal apne kāñdhoñ pe Daale hue

ḳhvāb jīvan ke sāhil kī jānib chale

dekhte dekhte kaañp kar khul gaye

soch ke malgaje malgaje bādbāñ

Doltī jhūmtī ghūmtī chal paḌīñ

zehn ke bahr meñ fikr kī kashtiyāñ

jagmagāne lagīñ

muskurāne lagīñ

duur tak ḳhvāhishoñ kī sajal mash'aleñ

dil ne mujh se kahā maiñ ne dil se kahā

aao ham bhī chaleñ

aur phir zehn ke be-karāñ bahr meñ

ḳhvāb ġhotoñ pe ġhote lagāne lage

apne jāloñ meñ rotī sisaktī huī yaad kī sīpiyāñ bhar ke laane lage

is se pahle ki dil

yaad kī sīpiyāñ khol kar in se aashā ke motī chune

is se pahle ki dil

yaad kī sīpiyāñ khol kar in se aashā ke motī chune

chashm-e-nam khul ga.ī

rāh-e-ġham khul ga.ī

raat gahri hui

nind zahri hui

apni zanjir ko meri taKHil se

toD kar chal paDi baat Thahri hui

jitne alfaz the

mere afkar ke kunj-e-tamhid mein

an-suni an-kahi tishna-lab baat ka taziyana bane

jitne sangit the

mere jazbaat ke saz-e-na-did mein

an-miTi hasraton ki larazti hui be-qarar ungliyon ka nishana bane

shauq ki rah mein raushni ki tarah

nach kar ghum kar phail kar baj uThin

ek be-surat naghme ki parchhaiyan

ruh ki dhund mein bastiyon ki tarah

dhaDkanen jag uThin le ke angDaiyan

dukh ke pathrile raste pe donon taraf

sukh ke kachche gharondon mein dipak jale

hath ek dusre ka sanbhaale hue

apne jal apne kandhon pe Dale hue

KHwab jiwan ke sahil ki jaanib chale

dekhte dekhte kanp kar khul gaye

soch ke malgaje malgaje baadban

Dolti jhumti ghumti chal paDin

zehn ke bahr mein fikr ki kashtiyan

jagmagane lagin

muskurane lagin

dur tak KHwahishon ki sajal mash'alen

dil ne mujh se kaha main ne dil se kaha

aao hum bhi chalen

aur phir zehn ke be-karan bahr mein

KHwab ghoton pe ghote lagane lage

apne jalon mein roti sisakti hui yaad ki sipiyan bhar ke lane lage

is se pahle ki dil

yaad ki sipiyan khol kar in se aasha ke moti chune

is se pahle ki dil

yaad ki sipiyan khol kar in se aasha ke moti chune

chashm-e-nam khul gai

rah-e-gham khul gai