ek laDki
gahrī niilī āñkhoñ vaalī
bholī-bhālī sī ik laḌkī
jis kā siina ġham se bojhal
mahfil meñ bhī sab se ojhal
tanhā aur udaas khaḌī hai
kis kā rasta dekh rahī hai
mahfil ke goshe goshe meñ
bātoñ ke jharne jaarī haiñ
doshīzāoñ ke hoñToñ se
phul-jhaḌiyāñ sī chhūT rahī haiñ
shoḳh javānoñ kī āñkhoñ meñ
kitnī yādeñ jaag uThī haiñ
vo laḌkī mab.hūt khaḌī hai
sab kī nazroñ se Dartī hai
apne aap se kuchh kahtī hai
lekin phir bhī chup rahtī hai
maiñ us ko yuuñ dekh rahā huuñ
jaise maiñ us kā saayā huuñ
jā.ūñ us ko jā kar keh duuñ
kyoñ gum-sum ḳhāmosh khaḌī ho
jīvan ke is moḌ pe aakar
kyā tum rasta bhuul ga.ī ho
is mahfil meñ apne dil se
kis kā Thikāna pūchh rahī ho
mere ghāyal dil kī bāteñ
us ke dil meñ aag lagā deñ
jab vo uThā.e apnī palkeñ
us kī aañkh se aañsū Dhalkeñ
jin meñ ik shā'ir kā dil ho
jo us laḌkī kī manzil ho
gahri nili aankhon wali
bholi-bhaali si ek laDki
jis ka sina gham se bojhal
mahfil mein bhi sab se ojhal
tanha aur udas khaDi hai
kis ka rasta dekh rahi hai
mahfil ke goshe goshe mein
baaton ke jharne jari hain
doshizaon ke honTon se
phul-jhaDiyan si chhuT rahi hain
shoKH jawanon ki aankhon mein
kitni yaaden jag uThi hain
wo laDki mabhut khaDi hai
sab ki nazron se Darti hai
apne aap se kuchh kahti hai
lekin phir bhi chup rahti hai
main us ko yun dekh raha hun
jaise main us ka saya hun
jaun us ko ja kar keh dun
kyon gum-sum KHamosh khaDi ho
jiwan ke is moD pe aakar
kya tum rasta bhul gai ho
is mahfil mein apne dil se
kis ka Thikana puchh rahi ho
mere ghayal dil ki baaten
us ke dil mein aag laga den
jab wo uThae apni palken
us ki aankh se aansu Dhalken
jin mein ek sha'ir ka dil ho
jo us laDki ki manzil ho
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.