aane wale din

aane vaale dinoñ kī harārat ko mahsūs karte hue

maiñ agar ye kahūñ

kal mirī ārzūoñ kī shāḳhoñ pe ḳhush-bū

bikhar jā.egī narm phūloñ kī sūrat meñ

aur chāñdnī muskurā.egī badlī kī chunrī pahn kar

to mujh ko ye mahsūs hotā hai, maiñ ne

havā ko pakaḌne kī koshish meñ nā-kām paayā hai ḳhud ko

ye nākāmiyāñ bhī

azal se marī ham-safar haiñ,

ki jab maiñ

zamīñ par koī peḌ ban kar ugā thā

ye kahnā ki ghar se maiñ be-ābrū ho ke niklā thā ik din

sarāsar ġhalat hai

ki maiñ aaj hī ghar ke āñgan meñ baiThā huā

phaile ākāsh ko dekhtā huuñ

jahāñ raushnī hai

jahāñ mere dil kā sukūñ chāñd ban kar khulā- hai

magar aane vaale dinoñ meñ to bārish hai, tūfān haiñ, āñdhiyāñ haiñ

aane wale dinon ki hararat ko mahsus karte hue

main agar ye kahun

kal meri aarzuon ki shaKHon pe KHush-bu

bikhar jaegi narm phulon ki surat mein

aur chandni muskuraegi badli ki chunri pahn kar

to mujh ko ye mahsus hota hai, main ne

hawa ko pakaDne ki koshish mein na-kaam paya hai KHud ko

ye nakaamiyan bhi

azal se mari ham-safar hain,

ki jab main

zamin par koi peD ban kar uga tha

ye kahna ki ghar se main be-abru ho ke nikla tha ek din

sarasar ghalat hai

ki main aaj hi ghar ke aangan mein baiTha hua

phaile aakash ko dekhta hun

jahan raushni hai

jahan mere dil ka sukun chand ban kar khula- hai

magar aane wale dinon mein to barish hai, tufan hain, aandhiyan hain