main hun apni shikast ki aawaz

dekh kar ashk mire tū ne kiyā hai mahsūs

yahāñ zaḳhmoñ kī numā.ish bhī hai dastūr ai dost

maiñ ne puujā thā inheñ maiñ ne chhupāyā thā inheñ

merī āñkhoñ se jo risne lage nāsūr ai dost

dard kī baat kisī hañstī huī mahfil meñ

jaise keh de kisī turbat pe latīfa koī

aarzū khoyā huā koī payambar-zāda

zindagī sahmī huī jaise za’īfa koī

maiñ ne ashkoñ ko chhupāyā vo magar chhup na sake

merī nā-kāmī kī rūdād bhī nākām huī

maiñ to masjid se chalā thā kisī kā'be kī taraf

dukh to ye hai ki 'ibādat mirī bad-nām huī

ab na kā'be kī tamanna na kisī but kī havas

ab to rotā huuñ kisī markaz-e-insāñ ke liye

ḳhud ko bechā unheñ bechā jo kabhī bik na sake

qasr-e-sultāñ ke liye taḳht-e-sulaimāñ ke liye

dekh kar ashk mere tu ne kiya hai mahsus

yahan zaKHmon ki numaish bhi hai dastur ai dost

main ne puja tha inhen main ne chhupaya tha inhen

meri aankhon se jo risne lage nasur ai dost

dard ki baat kisi hansti hui mahfil mein

jaise keh de kisi turbat pe latifa koi

aarzu khoya hua koi payambar-zada

zindagi sahmi hui jaise za’ifa koi

main ne ashkon ko chhupaya wo magar chhup na sake

meri na-kaami ki rudad bhi nakaam hui

main to masjid se chala tha kisi ka'be ki taraf

dukh to ye hai ki 'ibaadat meri bad-nam hui

ab na ka'be ki tamanna na kisi but ki hawas

ab to rota hun kisi markaz-e-insan ke liye

KHud ko becha unhen becha jo kabhi bik na sake

qasr-e-sultan ke liye taKHt-e-sulaiman ke liye