shahr kaghaz ka ek TukDa

ye bachchiyāñ 'ā.isha zubaida

zarīna kulsūm

shāh-rah se pare jo ik dūsre ke sar se

juueñ pakaḌne meñ munhamik haiñ

ye us nagar kī haiñ rahne vaalī

jo rail kī paTriyoñ ke pahlū meñ tā-hadd-e-nazar basā hai

yahāñ ke ghar is tarah se bā-ham-digar guthe haiñ

ki in ke andar shu'ā' kī dastaras nahīñ hai

havā-e-tāza bhī ḳhauf khātī hai

bhūle-bhaTke kabhī idhar se guzar ga.ī to kiyā ta'affun se dāġhdār us ne apnā dāman

ye bachchiyāñ 'ā.isha zubaida

zarīna kulsūm

raddī kāġhaz ke chand TukḌoñ kī justujū meñ

tamām din boriyāñ sañbhāle galī galī ḳhaak chhāntī haiñ

kahīñ nazar aa gayā inheñ koī ek TukḌā to is tarah us pe TūTtī haiñ

ki jaise haath aa ga.ī ho daulat

ye bachchiyāñ shahr meñ haiñ lekin

tamām shahrī masarratoñ se haiñ nā-shanāsā

kuchh is adā se guzar basar in kī ho rahī hai

ki jaise in kī nazar meñ ho shahr raddī kāġhaz kā ek TukḌā

ye bachchiyan 'aisha zubaida

zarina kulsum

shah-rah se pare jo ek dusre ke sar se

juen pakaDne mein munhamik hain

ye us nagar ki hain rahne wali

jo rail ki paTriyon ke pahlu mein ta-hadd-e-nazar basa hai

yahan ke ghar is tarah se ba-ham-digar guthe hain

ki in ke andar shu'a' ki dastaras nahin hai

hawa-e-taza bhi KHauf khati hai

bhule-bhaTke kabhi idhar se guzar gai to kiya ta'affun se daghdar us ne apna daman

ye bachchiyan 'aisha zubaida

zarina kulsum

raddi kaghaz ke chand TukDon ki justuju mein

tamam din boriyan sanbhaale gali gali KHak chhanti hain

kahin nazar aa gaya inhen koi ek TukDa to is tarah us pe TuTti hain

ki jaise hath aa gai ho daulat

ye bachchiyan shahr mein hain lekin

tamam shahri masarraton se hain na-shanasa

kuchh is ada se guzar basar in ki ho rahi hai

ki jaise in ki nazar mein ho shahr raddi kaghaz ka ek TukDa