hijr ki raat mein

tum ga.e the

jaise dariyā kināre se ret chhīn le

jaise havā patte se sargoshī kiye baġhair

bas guzar jaa.e

maiñ vo daraḳht huuñ

jis kī shāḳhoñ par ab sirf sannāTe ugte haiñ

patte ḳhāmosh haiñ

par har ḳhāmoshī meñ tumhārā naam gūñjtā hai

hijr ye koī fāsla nahīñ

ye ek aisī aag hai

jo andar hī andar jaltī hai

aur koī dhuāñ bhī nahīñ hotā

ki duniyā ko dikhā sakūñ

ki dekho maiñ jal rahā huuñ

raat kī god meñ leT kar

maiñ aksar tumhāre naam kī loriyāñ suntā huuñ

aur niiñd merī āñkhoñ se kahtī hai

vo jo ḳhvāb ban ke aatā thā

aaj use bhī hijr ho gayā hai

maiñ ab lafz nahīñ likhtā

mahaz ḳhāmoshiyoñ ko tartīb detā huuñ

aur vo sab tumhārā chehra banātī haiñ

be-āvāz magar zinda

'sāġhar' ab sirf tumhārī yaad se baat kartā hai

ki baaqī sab bolne vaale

ḳhālī shor haiñ

aur hijr

ek mukammal guftugū

tum gae the

jaise dariya kinare se ret chhin le

jaise hawa patte se sargoshi kiye baghair

bas guzar jae

main wo daraKHt hun

jis ki shaKHon par ab sirf sannaTe ugte hain

patte KHamosh hain

par har KHamoshi mein tumhaara nam gunjta hai

hijr ye koi fasla nahin

ye ek aisi aag hai

jo andar hi andar jalti hai

aur koi dhuan bhi nahin hota

ki duniya ko dikha sakun

ki dekho main jal raha hun

raat ki god mein leT kar

main aksar tumhaare nam ki loriyan sunta hun

aur nind meri aankhon se kahti hai

wo jo KHwab ban ke aata tha

aaj use bhi hijr ho gaya hai

main ab lafz nahin likhta

mahaz KHamoshiyon ko tartib deta hun

aur wo sab tumhaara chehra banati hain

be-awaz magar zinda

'saghar' ab sirf tumhaari yaad se baat karta hai

ki baqi sab bolne wale

KHali shor hain

aur hijr

ek mukammal guftugu