pardes qaid aur KHamoshi

aaj ke din galiyoñ meñ sabz jhanDe phir lahrā rahe haiñ

lekin jin hāthoñ ne kabhī aaTe se jhanDiyāñ chipkā.ī thiiñ

vo haath ab pardes kī mashaqqat meñ safedī oḌh chuke haiñ

vo jo mulk ke liye nā're lagāte the

saḌkoñ par hausle ke qāfile banāte the

vo aaj salāḳhoñ ke pīchhe ḳhāmosh baiThe haiñ

aur un kī āvāzoñ kī guuñj sirf dīvāroñ se Takrā kar lauT aatī hai

chauk meñ bajte qaumī naġhmoñ ke biich

ġhurbat kī gūñgī sadā dab jaatī hai

bāzār meñ sabz aur safed kapḌe bikte haiñ

magar safed aaTe kī qīmat maañ kī āñkhoñ se nikalne vaale āñsuoñ se ziyāda hai

qarz ke kāġhaz pe dastaḳhat karte hue

ham sochte haiñ kyā ye bhī āzādī hai

jab sochne par pābandī ho

bolne par ḳhatra ho

aur ummīd kī dīvār par har roz ek na.ī darāḌ paḌe

pardes meñ baiThā vo shaḳhs

jis ne kabhī schōl meñ āzādī kā tarāna buland āvāz meñ paḌhā thā

ab video call par bas itnā kahtā hai

yahāñ vaqt achchhā hai bas vatan kī yaad aatī hai

yaum-e-āzādī hai aaj

lekin kuchh dil qaid haiñ kuchh haath ḳhālī kuchh zabāneñ band

aur sabz parcham ke nīche

savāl ab bhī lahrā rahe haiñ

aaj ke din galiyon mein sabz jhanDe phir lahra rahe hain

lekin jin hathon ne kabhi aaTe se jhanDiyan chipkai thin

wo hath ab pardes ki mashaqqat mein safedi oDh chuke hain

wo jo mulk ke liye na're lagate the

saDkon par hausle ke qafile banate the

wo aaj salaKHon ke pichhe KHamosh baiThe hain

aur un ki aawazon ki gunj sirf diwaron se Takra kar lauT aati hai

chauk mein bajte qaumi naghmon ke bich

ghurbat ki gungi sada dab jati hai

bazar mein sabz aur safed kapDe bikte hain

magar safed aaTe ki qimat man ki aankhon se nikalne wale aansuon se ziyaada hai

qarz ke kaghaz pe dastaKHat karte hue

hum sochte hain kya ye bhi aazadi hai

jab sochne par pabandi ho

bolne par KHatra ho

aur ummid ki diwar par har roz ek nai daraD paDe

pardes mein baiTha wo shaKHs

jis ne kabhi school mein aazadi ka tarana buland aawaz mein paDha tha

ab wideo call par bas itna kahta hai

yahan waqt achchha hai bas watan ki yaad aati hai

yaum-e-azadi hai aaj

lekin kuchh dil qaid hain kuchh hath KHali kuchh zabanen band

aur sabz parcham ke niche

sawal ab bhi lahra rahe hain