duniya-o-din ke sarwar-o-sultan tumhi to ho

duniyā-o-dīñ ke sarvar-o-sultāñ tumhī to ho

salle-'alā sukūn-e-dil-o-jāñ tumhī to ho

amrāz-e-qalb-o-rūh kā darmāñ tumhī to ho

har manzil-e-hayāt kā sāmāñ tumhī to ho

dīdār-e-haq hai diid tumhārī zahe karam

be-shak ḳhudā kī shaan ke shāyāñ tumhī to ho

tashbīh meñ ho ahmad o tanzīh meñ ahad

īmāñ to ye hai hāsil-e-īmāñ tumhī to ho

parvāna-vār jinn-o-bashar kyuuñ na hoñ fidā

donoñ jahāñ kī sham'-e-farozāñ tumhī to ho

tum se shu'ūr-e-zīst bhī 'irfān-e-zāt bhī

afsāna-e-hayāt ke 'unvāñ tumhī to ho

apnī jo kī talāsh to mā'lūm ye huā

maiñ ḳhud kahāñ huuñ mujh meñ mirī jaañ tumhī to ho

dhaḌkan meñ dil kī maiñ ne tumhārī sadā sunī

bas ho na ho qarīb-e-dil-o-jāñ tumhī to ho

'tābāñ' ko kaalī kamlī meñ hifz-o-amāñ mile

rahmat-ba-dosh fazl-ba-dāmāñ tumhī to ho

duniya-o-din ke sarwar-o-sultan tumhi to ho

salle-'ala sukun-e-dil-o-jaan tumhi to ho

amraaz-e-qalb-o-ruh ka darman tumhi to ho

har manzil-e-hayat ka saman tumhi to ho

didar-e-haq hai did tumhaari zahe karam

be-shak KHuda ki shan ke shayan tumhi to ho

tashbih mein ho ahmad o tanzih mein ahad

iman to ye hai hasil-e-iman tumhi to ho

parwana-war jinn-o-bashar kyun na hon fida

donon jahan ki sham'-e-farozan tumhi to ho

tum se shu'ur-e-zist bhi 'irfan-e-zat bhi

afsana-e-hayat ke 'unwan tumhi to ho

apni jo ki talash to ma'lum ye hua

main KHud kahan hun mujh mein meri jaan tumhi to ho

dhaDkan mein dil ki main ne tumhaari sada suni

bas ho na ho qarib-e-dil-o-jaan tumhi to ho

'taban' ko kali kamli mein hifz-o-aman mile

rahmat-ba-dosh fazl-ba-daman tumhi to ho