mohammad mustafa ka jab kisi ke lab pe nam aaya

mohammad mustafā kā jab kisī ke lab pe naam aayā

farishtoñ kī mubārakbād hūroñ kā salām aayā

ba-qadr-e-'aql dī tauhīd kī tā'līm duniyā ko

'ajab andāz se ye rahbar-e-har-ḳhās-o-'ām aayā

jafā sah kar vafā kī gāliyāñ sun kar du'āoñ meñ

mire maulā ke dil meñ jab ḳhayāl-e-intiqām aayā

bure un ke bhale allāh ke haiñ to gunahgāro

tumheñ kyuuñ ḳhauf-e-dozaḳh hai jo ye e''lān-e-ām aayā

mohammad hāmid-o-mahmūd-o-ahmad ism-e-ā'zam haiñ

ye naam aa.e zabāñ par kāmrānī kā payām aayā

madīna aisī arz-e-pāk jis ke zarre zarre par

malā.ik sar-ba-sajda ho ga.e jab ye maqām aayā

na rakkhī jis ne nisbat sarvar-e-kaunain se 'tābāñ'

na duniyā us ke kaam aa.ī na 'uqbā us ke kaam aayā

mohammad mustafa ka jab kisi ke lab pe nam aaya

farishton ki mubarakbaad huron ka salam aaya

ba-qadr-e-'aql di tauhid ki ta'lim duniya ko

'ajab andaz se ye rahbar-e-har-KHas-o-'am aaya

jafa sah kar wafa ki galiyan sun kar du'aon mein

mere maula ke dil mein jab KHayal-e-intiqam aaya

bure un ke bhale allah ke hain to gunahgaro

tumhein kyun KHauf-e-dozaKH hai jo ye elan-e-am aaya

mohammad hamid-o-mahmud-o-ahmad ism-e-a'zam hain

ye nam aae zaban par kaamrani ka payam aaya

madina aisi arz-e-pak jis ke zarre zarre par

malaik sar-ba-sajda ho gae jab ye maqam aaya

na rakkhi jis ne nisbat sarwar-e-kaunain se 'taban'

na duniya us ke kaam aai na 'uqba us ke kaam aaya